Dette veit vi om Israel sine rørsler inne i Libanon

IDF har ikkje sjølv sagt at bakkestyrkane som har teke seg inn i sørlege Libanon kan skildrast som ein invasjon.

Talsperson for det israelske militæret Daniel Hagari, kallar operasjonen for eit «utvida raid».

Men israelske soldatar er inne i Libanon, og deltek framleis i kampar mot Hizbollah på bakken.

Korkje Israel eller Hizbollah seier nøyaktig kva desse går føre seg.

Men evakueringsordrane som har kome frå Israel onsdag, viser kvar dei meiner det blir for farleg for libanesarar å opphalde seg.

Varslar mange timar til med angrep

Ifølge det israelske militæret vil deira «operasjonar i Libanon» halde fram gjennom natta.

Talspersonen seier likevel at bakkestyrkane «ikkje har planar om å dra til Beirut eller byar sør i Libanon».

Det har likevel vore nye luftangrep mot Beirut tysdag ettermiddag, ifølge Reuters. Mange av angrepa har vore mot forstaden Dahieh, som Hizbollah kontrollerer.

Omtrent samtidig sende den amerikanske ambassaden i Israel ut ein naudvarsel til sine tilsette, og bad dei om å reise heim eller gjere seg klare for å gå inn i eit bomberom.

Dette er den første beskjeden av sitt slag som har kome sidan Iran sine luftangrep på Israel i april.

Hektisk diplomati

Situasjonen ein no ser i Libanon er ekstremt alvorleg, seier den norske utanriksministeren Espen Barth Eide tysdag.

– Det er nett den eskaleringa vi har frykta lenge, at vi går frå ein veldig dramatisk situasjon i Gaza og på Vestbreidda til ein meir internasjonal konflikt, seier han.

– Over tusen sivile liv har gått tapt, og opp mot ein million menneske er på flukt.

Eide fortel at det har gått føre seg hektisk diplomati mellom mange land for å prøve å stoppe Israel sin bakkeinvasjon.

I tillegg har dei oppfordra til våpenkvileforhandlingar, seier han.

– No ser det snarare ut til at våpena skal tale.

Trass i varselet frå USA, har ikkje Iran sitt svar på angrepa kome enno. Iran støttar Hizbollah, og har varsla hemn mot Israel sidan Hizbollah-leiaren blei drepen.

Ifølge Barth Eide ønsker ikkje landet ei eskalering.

– Samtidig veit vi at det kan vere mykje press internt, no som mange av Iran sine allierte i regionen blir direkte angripne.

Vesentleg fleire israelske angrep

I nesten eit år har Hizbollah utført luftangrep mot mål i nordlege Israel, og Israel har gjort det same mot deira mål i sørlege Libanon.

No som konflikten på nytt har eskalert, lurar mange på kor lenge dei israelske styrkane kjem til å vere der.

Israel sin viktigaste alliert, USA, meiner at det er snakk om dagar og ikkje veker. Det seier fleire amerikanske tenestepersonar til NBC News tysdag.

USA sender forsterkingar

Den amerikanske presidenten sender inn «eit par tusen til» styrkar til Midtausten for å styrke Israel sitt forsvar, sa USA sitt forsvarsdepartement seint i går.

Det finst allereie 40.000 amerikanske soldatar i regionen, blant anna ved basar i Syria, som grensar til Libanon, og Irak.

Fleire toppleiarar seier til New York Times at støtta inneheld kampfly av typen F-15, F-16, F-22 og A-10.