Sarah (24) har ei mor som kom tidleg i overgangsalderen: – Det kan skje med meg òg

Ho var berre 38 år og forstod ikkje kva som skjedde.

Trebarnsmor Stine Sørensen hadde fem vekers samanhengande menstruasjon og trudde ho hadde kreft.

Redselen sleppte først da gynekologen slo fast at dette var overgangsalder.

Vanlegvis mistar kvinner mensen når dei er mellom 45 og 55 år, ifølge Helse Noreg. Men sjølve overgangsalderen startar nokre år før blødingane stoppar.

I overgangsalderen går nivået av østrogen ned, og det kan påverke kroppen både fysisk og psykisk.

Snakka med barna

Stine Sørensen blei meir var på kjensler enn vanleg. Søvnen var dårlegare. Nå er den tida forbi.

Barna har fått vite at ho hadde «kortare lunte».

Dei har ledd av at det var så kaldt på soverommet, fordi ho var så varm.

For å ufarleggjere denne fasen, har ho vore opptatt av å snakke med både familie og venner om korleis ho opplevde denne.

Stine Sørensen var på familieferie i Brasil i 2002 med dottera på sju år og tvillingane på tre år da ho merka at noko ikkje var som det skulle.

Foto: Privat

Stine Sørensen var på familieferie i Brasil i 2002 med dottera på sju år og tvillingane på tre år da ho merka at noko ikkje var som det skulle.

Foto: Privat

Ikkje minst har døtrene fått vite at dei også kan risikere å miste menstruasjonen tidleg.

– Vi får jo barn seinare i livet. Det var viktig for meg å fortelje jentene at dette kan vere arveleg, seier Sørensen.

Dottera Sarah Zimmermann Børresen (24) drikk kaffi med mora i hagen. Ho synest openheita til mora er bra.

Særleg med tanke på hennar eiga moglegheit for å få barn, viss ho sjølv skulle komme like tidleg i overgangsalderen.

– Det er ein ting eg bør tenke på i framtida og vere klar over at det kan skje med meg òg.

Gir barna ei forklaring

Nokre døtrer kan ha siste menstruasjon og lik oppleving av overgangsalder som mødrene sine, fortel lege og forskar på overgangsalder, Marianne Natvik.

Ho synest det er lurt at mødrer snakkar med barna sine om overgangsalder.

– Det normaliserer denne tida alle kvinner skal igjennom.

Det bidrar til at det ikkje blir eit mystisk aldringsteikn vi puttar i skammekroken, seier ho.

Jo meir overgangsalderen blir snakka om, jo meir kan andre kvinner kjenne igjen symptom, som hetetokt, søvnproblem og humørsvingingar, meiner Natvik.

Ser endring på fire år

Forskaren opplever meir openheit og kunnskap om overgangsalder blant kvinner nå, samanlikna med da ho starta å forske på denne perioden for fire år sidan.

Ho snakkar med mange legar og kvinner i arbeidet sitt med fagfeltet.

–Eg tenker at det blir snakka meir om denne tida i samfunnet. Kvinnene set det meir på dagsordenen og tar det opp med legen sin.

– Kvifor har det skjedd ei endring?

– Eg trur det handlar om at det blir snakka meir om overgangsalderen i media. Eg trur vi er ein generasjon kvinner nå som er i denne tida, eller skal inn i overgangsalderen, som har lyst til å vite meir.

Kvinner deler også historiene sine i sosiale medium, legg ho til. Hormonterapi har fått merksemd og kvinner vil ha hjelp når dei har plager, seier ho.

• Fekk resept for hormonplaster, men har ikkje fått tak i plasteret på eitt år.

Skriv bok om korleis overgangsalder kjennest

Dora Thorhallsdottir i Tønsberg er snart ferdig med å skrive bok om korleis kvinner opplever å vere i overgangsalderen.

Familieterapeuten har også reist land og strand i Noreg med eit standupshow om overgangsalderen.

Da ho på Facebook og Instagram bad om folks personlege opplevingar, kom det inn 160 historier.

Folk har hatt skremmande låg kunnskap om overgangsalderen, meiner ho.

– Det som er gjennomgåande i mange historier, er at mange trudde det var noko gale med dei i lang tid. Heilt til dei, lege eller kollega skjønte at det var overgangsalder, seier Thorhallsdottir.

Snakkast meir om

Thorhallsdottir meiner også at det har blitt meir openheit om perioden dei siste tre åra.

Fleire kvinner vil ha informasjon.

– Det er akkurat som om vi har vakna litt.

Det blir skrive meir om overgangsalderen, det er fleire som snakkar om han og det har komme fleire bøker, påpeikar ho.

– Det har skjedd enormt mykje og det treng vi. For fy søren, kor mykje kvinner har lidd i stille på grunn av overgangsalderen og ikkje visst kva plager som er overgangsrelaterte.