Nesten 300 pasientar ramma av ny feil i Helseplattforma

Helseplattforma har oppdaga ein ny feil som har ført til at 291 pasientar i Helse Møre og Romsdal ikkje har blitt vist vidare.

Fleire av pasientane har ikkje blitt sett på ventelister for vidare oppfølging, skriv dei sjølve.

Feilen blei oppdaga fredag 25. oktober.

– Dette skal ikkje skje. Vi beklagar at det ikkje har vore godt nok system for å følgje opp avvika. Vi vil no ta ein gjennomgang av interne prosessar og driftsrutinar for å sjå på korleis vi skal unngå at dette skjer i framtida, seier Siri Berg, konstituert administrerande direktør i Helseplattforma AS.

Dei er i full gong med å undersøke feila i journalløysinga. Systemet for overvaking blei vart retta same dag.

– Vi beklagar på det sterkaste at feilen har ramma pasientar som ventar på oppfølging hos oss. Det er for tidleg å si noko om feilen vil medføre negative konsekvensar for den enkelte pasient. Nå vil vi på ein rask og trygg måte gjennomgå kvar enkelt pasient og sørge for at de får den oppfølginga de skal ha. De som er råka vil bli kontakta fortløpande av oss, seier innføringsleiar Henrik Erdal i Helse Møre og Romsdal.

Helse Møre og Romsdal har varsla statsforvaltaren om avviket.

Riksrevisjonen slakta Helseplattforma

Førre veke kom Riksrevisjonen med ein ny rapport som slakta innføringa av Helseplattforma. Dei meiner den har redusert effektiviteten i pasientbehandlinga og blitt dyrare enn dei trudde.

Riksrevisor Karl Erik Schjøtt-Pedersen meinte at planlegginga, organiseringa og innføringa av Helseplattforma i Midt-Noreg var sterkt kritikkverdig.