– Dette er heilt fantastisk, vi er heilt overvelda

Filmen er regissert av Halfdan Ullmann Tøndel, som er sonen til Linn Ullmann og barnebarnet til Liv Ullmann.

Han har også skrive manuset.

Det er første gong ein norsk regissør får ein pris under hovudkonkurransen under Cannes-festivalen.

Tidlegare veka fekk filmen ein «sidepris» for beste lydarbeid.

Produsent Andrea Berentsen Ottmar er særs nøgd då vi fekk tak i ho rett etter at prisen var eit faktum.

– Dette er heilt fantastisk, vi er heilt overvelda, seier Ottmar til NRK.

– Kva trur du er årsaka til at juryen valde ut Armand?

– Eg håpar og trur at dei har sett det originalen og unike det han har gjort. Han har ei veldig unik registemme som har kome tydeleg fram i debuten sin.

Ottmar håpar prisen er inspirerande og motiverande for alle som jobbar med norsk film.

– Eg synest det er utruleg at vi kan vise oss på dette nivået. Vi høyrde jo når vi var i Cannes at det er ei slags «Norsk bølge» no. Den tenker eg vi må ri på alle når vi kan.