Staten tettar hol som kosta 300 millionar kroner

NRK

Elise Caspersen, fagansvarleg for maritim i ZERO

Det er mange som er klare til å kutte utslepp frå skipsfarten, og Enova gjer lurt i å endre kriteria slik at støtta går til å bygge opp ei verdikjede i Noreg og kutte utslepp i norske farvatn. I tillegg til Maris Fiducia, fekk norske Höegh Autoliners støtte til ammoniakk i fire fartøy som ikkje skal segle i norsk farvatn. Vi heiar på aktørar som går føre og viser veg i det grøne skiftet.

Hub For Ocean

Kristin Svardal, leiar i Hub for ocean

Vi forstår at det kan komme reaksjonar, men samtidig ønsker vi å støtte gode prosjekt som kjem utvikling av næringa til gode og som bidrar til reduksjon av utslepp i maritim sektor. Dette er ein bransje der samarbeid på tvers av landegrenser er vanleg, og vi ser derfor at bedriftskonsortium ofte søker støtte frå fleire land.

NRK

John Anders Lindtveit Røse, Maritimt forum

Det er viktig at det norske verkemiddelapparatet sikrar at midlane går til å sikre grøn omstilling i norsk maritim næring. Dette er viktig for å vareta konkurransekrafta til dei norske aktørane. Ikkje minst er det viktig for å sikre legitimiteten til støtteordningane.

Kilian Munch

Toril Kobbeltvedt, direktør for politikk og analyse i Rederiforbundet

Ei robust verdikjede for grøne drivstoff er heilt essensielt for at vi skal lykkast med den omstillinga som skipsfarten skal gjennom. Samtidig har den norske utanriksflåten store utslepp utanfor Noreg, og dette talet må ned dersom vi skal nå klimamåla. Derfor må verkemiddelapparatet også treffe desse reiarlaga. Teknologien som blir utvikla i desse reiarlaga vil kunne overførast til skip i Noreg.

Hans Olav Landsverk

Asle Strønen, leiar i Norske Skipsverft

Det er på tide at både verkemiddelapparatet og enkelte politiske krinsar tar inn over seg kven ein skal representere. Utsleppskutt i norske farvatn bør prioriterast, og berre reelle norske aktørar skal favoriserast med støtte frå den norske fellesskapen. Eigentleg bør dette vere ganske så elementært.

NRK

Håkon Skjerstad, Azana fuel solutions

Vi er usikre på om kravet til minst ein tredel av anløpa i norske hamner vil vere tilstrekkeleg for å etablere ein marknad for ammoniakk blant skip som opererer på norsk kontinentalsokkel. Det vil i så fall vere veldig synd, for myndigheitene har nå eit unikt høve til å skape ein heimemarknad som kan posisjonere norske aktørar som verdsleiande innan grøn maritim industri.

Norsk hydrogenforum

Ingebjørg Telnes Wilhelmsen, generalsekretær Norsk Hydrogenforum

Enova har gjort ein veldig god jobb med utviklinga av støtteprogramma hydrogen og ammoniakk i fartøy, og vi har stor tru på at desse programma vil utløyse investeringar i ei rekke skip med hydrogen og ammoniakk som drivstoff. Det er viktig at programma bidrar til lokal industribygging og utvikling av ei heilskapleg nasjonal verdikjede for hydrogen.

NHO Vestland / NRK

Helene Frihammer, regiondirektør i NHO Vestland

Noreg har gode føresetnader for å utvikle konkurransedyktige verdikjeder for både blått og grønt hydrogen. For å lykkast må vi stimulere til at dei ulike ledda i verdikjedene blir bygde opp. Det er samtidig viktig at midlane blir brukte etter intensjonen og at retningslinjer og resultat stadig blir gjennomgått for å sikre at ein treffer rett og unngår uheldige konsekvensar.

Ole Berg-Rusten / NTB

Alfred Bjørlo, Venstre

Det aller mest skandaløse i denne saka er at Vestland og andre kystfylke ikkje får avklaringane dei treng frå regjeringa for å bestille nye hurtigbåtar som kuttar klimautslepp med ny teknologi utvikla i norske verdigkjeder.

Yann Valerievich Belov / n18575

Sofie Marhaug, Raudt

Den politiske styringa av Enova må styrkast, og det i retning av meir energieffektivisering. Dette i motsetning til å kaste bort pengar på prestisjeprosjekt i utlandet som ikkje kuttar utslepp i Noreg. Dette må bli tydeleg i det nye mandatet regjeringa nå jobbar med.

Tom Nicolai Kolstad

Arild Hermstad, leiar i MDG

Det er eit stort paradoks og samtidig veldig urovekkande at utsleppa frå industrien knapt har falle dei siste ti åra samtidig som staten har betalt ut milliardbeløp i klimakompensasjon til industrien. Det føyer seg inn i eit mønster kor store selskap får utbetalt milliardstøtte for klimatiltak mens vanlege folk knapt får noko støtte, og opplever at det er dyrt og vanskeleg å leve klimavennleg.

Vidar Ruud / NRK

Ove Trellevik, Høgre

Regjeringa si hydrogensatsing feilar, vi treng ein ny hydrogenstrategi. Regjeringa sin politikk tappar Enova for ressursar utan at vi får noko igjen for det her i landet. Urealistiske hydrogenprosjekt får reservert kraft i nettet og sperrar for andre prosjekt som har finansieringa på plass.