Sindre (23) og Andrea (19) kan få sletta deler av lånet sitt om dei flytter heim

– Det er veldig bra. No er det enda ein grunn til å flytte heim igjen, seier Sindre Stenseth Pettersen (23).

Han er byggingeniør-student ved NTNU på Gjøvik, men er frå Trysil.

Når han blir ferdig med studia, har han planar om å flytte heim til kommunen i Østerdalen.

– Eg er veldig glad i plassen eg kjem frå, og har allereie jobb. Så det er opplagt at eg skal flytte heim eigentleg, seier Stenseth Pettersen.

Trysil er 1 av i alt 212 kommunar i Noreg som blir definert som kommune i sentraliseringsklasse 5 eller 6.

No vil regjeringa slette deler av studiegjelda til tidlegare studentar som bur og jobbar i distriktskommunar.

• Les også om eit anna grep regjeringa vil gjere som får studentane til å juble.

Kan spare 25.000 i året

For dei som bur i desse kommunane, betyr det at ein kan få sletta 25.000 kroner av studielånet sitt årleg frå januar 2026.

Føresetnadane er at personen er busett i ein kommune som er omfatta av ordninga i minst eitt år, og er yrkesaktiv.

Om dette er på plass, kan ein få sletta utdanningsgjeld kvart år, fram til gjelda er nedbetalt.

Dette gjeld både elevar i vidaregåande utdanning og høgare utdanning.

Nestleiar i utdannings- og forskingskomiteen på Stortinget, Marit Knutsdatter Strand (Sp), håper tiltaket vil motivere folk til å ta høgare utdanning og flytte tilbake, eller til, distrikta etter enda utdanning.

– Vi treng også kompetanse rundt omkring i heile Noreg. Dette er eit grep vi vil ta for å gjere at fleire får moglegheit til å ta både god vidaregåande utdanning og høgare utdanning, seier Strand.

– Mange må flytte på seg for å ta høgare utdanning eller vidaregåande utdanning. Då treng dei motivasjon for å flytte heim igjen etter enda utdanning, og det skal dette bidra til.

• Datofeil fekk store konsekvensar for Marius (27). Les om korleis han gjekk glipp av 50.000 kroner.

Doblar ordninga i nord

Frå før har studentar frå Finnmark og Nord-Troms fått sletta 20 prosent av gjelda si.

I tillegg til å utvide ordninga til å gjelde alle distriktskommunar i Noreg, vil regjeringa også forbetre vilkåra for gjeldslette i nord.

Der blir satsen dobla frå 30.000 kroner i året, til 60.000 kroner i året frå 2026.

– Det handlar om landets tryggleik og å ha kompetanse til å løyse dei lovpålagde oppgåvene som er i lokalsamfunna, seier stortingsrepresentant Lise Selnes (Ap).

– Vi ser no at ein del distrikt slit med å få den kompetansen dei treng. Då er dette eit tiltak for å prøve å påverke samfunnsutviklinga.

Prislapp: 1,3 milliardar

Regjeringa forventar at gåvepakka dei kjem med til studentane med lån, vil koste 12 millionar kroner i 2025.

Når det er fullt trappa opp ser prislappen ut til å ende på 1,3 milliardar kroner, men utgifta kan variere frå år til år.

– Det er ein stor sum som skal bidra til å motivere og stimulere til at fleire i bygder og små stader tek høgare og god vidaregåande utdanning, seier Strand.

Her kan du søke opp din kommune og sjå om tiltaket kan gjelde deg:

No jobbar regjeringa med å få fleirtal på Stortinget for å få saka gjennom i det nye statsbudsjettet.

– Vi skal forhandle hardt for dette når det kjem til Stortinget no i oktober, seier Strand.

• Renta er høgare enn på lenge. Fleire vil at politikarar skal bestemme renta på studielånet.

– Bra tiltak

Studenten frå Trysil set pris på tiltaket frå regjeringa, og håpar det kan få enda fleire til å sjå mot distriktskommunane.

– Det er eit veldig bra tiltak frå regjeringa å investere pengar i studentane, seier Stenseth Pettersen.

– Det betyr ikkje så mykje for meg no i dag, sidan eg ikkje har begynt å betale ned på lånet enno.

Han får støtte frå Andrea Fiske (19) frå Surnadal som nyleg har starta på byggingeniørutdanninga på NTNU.

– Det gjer kanskje til at enda fleire vil flytte heim. Så det er kjempebra, seier ho.