Nå vil «alle» studentar på utveksling: Spesielt eitt land trendar

Koalaer, kenguruar, plussgrader og høge bølger. Det er eit lite utval av kva landet «Down Under» har å by på.

Mattis Veine Karterud frå Fredrikstad var ein av 1360 som valde å utveksle til Australia i fjor.

Mens det er færre som vil til USA på utveksling, har Australia blitt trendy.

– Familien min har alltid pusha på utveksling fordi det viktig å reise og oppleve verda. Da eg fekk vite at ein kunne ta utveksling i Australia var eg heilt sikker, det var dit eg skulle, forklarer Fredrikstad-mannen.

• Hanna valde å studere i Frankrike to gonger.

Mange ting som lokkar

– Australia er eit fantastisk land å studere i.

Det seier professor i antropologi Gro Ween. Eit av spesialfelta hennar er kulturar i Australia.

Ween trur det er fleire ting som gjer at Australia har blitt populært for utvekslarar.

– Australia har fantastisk natur og strender. Og det er store sofistikerte byar med rikt kulturelt mangfald.

Vidare trur professoren at studentane blir lokka av akademiske årsaker.

– Alle dei store byane i Australia har veldig gode universitet, gode program, og eit rikt internasjonalt studentliv.

Vil ha fleire til ikkje-engelskspråklege land

Gro Tjore er assisterande direktør i HK-dir. Ho er veldig fornøgd med at talet på utvekslingsstudentar aukar.

I 2022 var det 7175 studentar som reiste ut. I 2023 auka talet til 8085.

– Strenge restriksjonar førte til stor nedgang i pandemiåra. Men nå er tala høgare enn 2019-nivået. Det er ein veldig positiv trend, fortel Tjore.

HK-dir. har som mål at halvparten av alle studentane i landet skal ha eit studieopphald i utlandet.

Men dei ønsker at fleire reiser til samarbeidsland utanfor Europa, og stader som ikkje har engelsk som morsmål.

– Det er ein auke i utveksling til Japan. Det ser vi på som veldig positivt, forklarer den assisterande direktøren.

FOMO-generasjonen

Mange frå Generasjon Z deler livet sitt på sosiale medium.

Spesielt TikTok er ein populær app for å vlogge om utveksling. Karterud var ein av dei som aktivt delte videoar frå Australia-turen.

– Eg trur fleire får lyst å reise rundt når dei ser andre reise. Det oppmuntrar. I tillegg får generasjonen vår lett FOMO.

Spesielt ein kveld hugsar Karterud skikkeleg godt.

Han hadde ein romkamerat som var frå Singapore. Ein kveld fekk kompisen besøk av både gutar og jenter.

– Ingen kjente kvarandre. Ingen drakk alkohol. Dei berre hadde det gøy og blei kjent med kvarandre, fortel Karterud.

Karterud drog til Australia for å utvide horisonten og oppleve ein ny kultur. Han angrar ikkje på at han valde å reise dit, men nå vil han reise vidare.

– Eg kjenner eg har plukka med meg det som er å hente frå Australia. Om eg kunne fått ei ny reise hadde turen gått til Sør-Amerika.

Etter å ha reist i verda skreiv Mattis Karterud ein kronikk i P3. Les den her: