Misnøye på ferja: Svele med altfor lite smør og brunost

VERDAS BESTE? Denne svela kan umogeleg vere Norges eller verdas beste svele, meiner svelekunde og ferjepassasjer Irene Jacobsen. Foto: Irene Jacobsen

Fjord1 skryt av at dei sel Norges beste svele. Tull, meiner Irene Jacobsen.

• 

• Frank Ertesvåg

mandag 17. juni kl. 07:50

Kortversjonen

• Fjord1 hevdar å selge Norges beste heimelaga svele, men Irene Jacobsen er usamd.
• Under ein ferjetur på strekninga Mortavika-Arsvågen søndag, fekk ho servert ei svele som skuffa ho stort.
• Jacobsen meiner svela var både visuelt og gastronomisk var lite å skryte av, med minimalt med smør og brunost.
• Ho spør seg kva som eigentleg blir tilbode svoltne turistar i fjord- og ferjelandet Norge i sommar.
• Fjord1 seier seg samde i at den aktuelle svela hadde for lite smør og brunost.

Ho kjøpte seg søndag ei svele på ferja mellom Mortavika og Arsvågen i Rogaland.

Det vart inga stor oppleving korkje visuelt eller gastronomisk.

– Uff, det var så stusseleg. Eit syltynt lag med smør og ei einsam, lita skive brunost på svela, skildrar Jacobsen.

Smører ikkje tjukt på

I ein liten tekst som ho har send VG - utdjupar ho:

– Er det årets flauaste mat langs vegen? I kafeen på ferja mellom Arsvågen og Mortavika seier dei som jobbar der at dei berre gjer som dei har fått beskjed av Fjord1. Altså 1 stykk «brunostsnei» og minst mogeleg smør, skriv Jacobsen om det som Fjord1 gjerne omtalar som Norges- ja heile verdas beste heimelaga svele.

I kaféen skal beteninga ha uttalt til sitt forsvar at vedkomande sjølv heller ikkje likte smør.

Eigentleg ikkje så glad i svele

– Er det verkeleg dette vi tilbyr dei mange turistane som kjem til landet i månadane framover? spør Jacobsen.

Ho legg til at ho har reist på andre ferjesamband der svela har vore mykje meir freistande.

– Du er glad i svele?

– Nei, eigentleg ikkje så veldig glad i svele. Men eg prøver å like det.

– Har du smakt noko verre enn den svela du tok bilde av?

– Ja, eg har faktisk smakt verre mat. Men det må gå an å tilby eit meir appetittvekkjande produkt enn det eg kjøpte for 44 kroner på denne ferja.

– For dyrt med 44 kroner?

– Ja, kva meiner du? spør Jacobsen attende.

Fjord1: Litt snaut med smør og brunost

Tor Kristoffersen, som har informasjons-ansvaret for ferjestrekninga Mortavika-Arsvågen i Fjord1, vil gjerne ha tilsend biletet av den aktuelle svela.

Han overlet til Olav Strømstad - som har kioskansvaret i ferjeselskapet - å kommentere svele-saka.

– Dette var litt snaut med brunost og smør. Det er ikkje slik det skal vere, seier Strømstad til VG etter å ha sett biletet av svela.

– De skryt av å lage verdas beste heimelaga svele på heimesidene dykkar?

– Den skal ikkje vere slik som den svela denne kunden har kjøpt. Dei som smører svelene kan nytte skjønn til å finne ut kor mykje smør, smørkrem og ost dei legg på, svarar Strømstad.

– Kva tenkjer du om at beteninga på ferja skal ha begrunna tynt smørlag med at ein ikkje likte smør sjølv?

– Det er ikkje slik det skal vere. Slike utsegner skal vi ikkje kome med. Dette skal vi ta opp i neste fellessamling, seier kioskansvarleg Bjørn Strømstad.