Mindretalsbyrådet tar over makta i Trondheim: – Verst mogeleg start

• Finansbyråden går av før han hadde begynt.
• Dei krangla om eigen plattform på grunn av eit skogområde.
• Byrådet er i mindretal.

– Dette er verst mogeleg start for det som blir eit mindretalsbyråd i Trondheim.

Det seier politisk redaktør Siv Sandvik i Adresseavisen til NRK i politisk kvarter.

– Folk var usikker på om byrådet kom til å bli danna. No kjem dei til å bli det, men usemja rundt areal lev vidare, legg Sandvik til.

Kaos rundt bystyret før dei har begynt

Finansbyråden måtte gå av og blei erstatta av Kjetil Reinskou.

Og usemja innad i Høgre har skapt usikkerheit rundt samarbeidet mellom partia i det nye byrådet.

Det handla om arealplanen til kommunen og vern eller utbygging i Tillermarka, eit skogområde i Trondheim.

Men byrådet er i mindretal og klarer ikkje få fleirtal for arealplanen i bystyret. No vel dei å utsette dette til etter sommaren.

– Me har ikkje kome i mål med ein heilskapleg avtale som har fleirtalet i bystyret. Det har kome mange innspel frå aktørar heilt fram til i dag, seier gruppeleiar Berit Tiller i Høgre til NRK.

– Målet er å få ei betre behandling og ei korrekt behandling, legg ho til.

– Sentrum-Høgre er ikkje styringsdyktig

Opposisjonen reagerer kraftig på at styringspartia no vil utsette saka om arealplanen til kommunen.

– Dei greier ikkje å sikre seg fleirtal i bystyret for dei viktige og store sakene, seier Mona Berger i SV til NRK.

Ho meiner dette har vore eit problem sidan partia tok over makta etter kommunevalet i haust.

– Sidan sentrum-Høgre tok over styringa har me sett at dei rett og slett ikkje er styringsdyktig.

Berger meiner dei forskjellige partia sine mål i sentrum-høgre er motstridande og ikkje harmonerer.

– Det er det me ser no. Det å greie å skaffe 3000 dekar næringsareal er frykteleg vanskeleg utan å bygge ned dyrka mark, myr, viktige skogområde som Tillermarka.

– Kaos er også ein god ting

Det er ikkje berre i Trondheim det har storma rundt byrådet og politikken deira.

Same veke som Ferhat Güven gjekk av som finansbyråd i Trondheim, måtte også finansbyråden i Bergen gå av.

– Kanskje vil parlamentarisme verke som meir kaotisk, men i realiteten får ein meir debatt om viktige saker. Og det er også ein god ting.

Det seier politisk kommentator i Bergens Tidende, Gerd Margrete Tjeldflåt. Ho har følgt byrådet i Bergen gjennom mange år med bybane-kaos. Og dersom politikarane i byrådet ikkje gjer som dei seier, blir dei haldne til ansvar.

– Det er eit fleirtal i bystyret som kan felle byrådet viss dei ikkje gjer det dei seier. Det er det ultimate riset bak spegelen.

Mindretalsbyråd

Det historiske byrådet er i mindretal i bystyret og må forhandle med andre parti for å få gjennom sakene sine.

Men byrådsleiar Kristian Dahlberg Hauge er sikker på at dei skal få til gode samarbeid med dei andre partia.

– Me er veldig klar over at me er eit mindretalsbyråd. Det betyr at me må hente støtte frå ulike parti i bystyret. Og den jobben bidreg berre til at me får meir politisk diskusjon og gode politiske prosessar i bystyret.

Og i bystyret har byrådet samarbeidspartia Pensjonistpartiet, Senterpartiet og Kristeleg Folkeparti.

– Det samarbeidet skal me forvalte godt og så skal me har ein god dialog med andre parti.

Byrådsleiaren er optimistisk og klar for å leie Trondheim inn i den nye politiske styringsforma.

– Det skal vere kortare veg for å gjennomføre det me seier her enn det har vore tidlegare. Er det noko den nye modellen skal kjenneteiknast av så er det gjennomføringskraft, seier Dahlberg Hauge.