Mann sikta for å ha valdteke barn under 14 år

Ein mann er sikta etter straffelovas paragraf 299, for valdtekt av barn under 14 år.

– Han vedgår ikkje straffskuld, seier forsvarar Jørgen Riple.

Påtalemakta har bedt om fire veker varetektsfengsling med brev- og besøksforbod og fått medhald i det. Éi av vekene er i full isolasjon.

Fengslingsmøtet i Hordaland tingrett laurdag føremiddag var stengd for pressa.

– Det er ei avgjerd som blir tatt i bruk av omsyn til etterforskinga og til dei involverte partane, seier politiadvokat Katrine Engelsgjerd Eikestad.

– Fornærma er mindreårig, og så er det forhold frå min klient si side som gjer at det var ønskeleg med lukka dører, seier Riple.

Har ikkje forklart seg

Politiadvokat Eikestad vil ikkje kommentere alder på den sikta, når eller kor hendinga skal ha skjedd.

– Per no er det alt for tidleg å gå ut med.

Ho seier at etterforskinga er i ei tidleg fase og at politiet av omsyn til dei involverte ikkje vil kommentere innhaldet i saka eller etterforskinga.

Mannen har laurdag føremiddag ikkje forklart seg til politiet.

Forsvarar Jørgen Riple seier til NRK at han har bedt om at klienten blir lauslaten.

– Eg har råda han til å vente med å svare på spørsmål og til å svare nei på spørsmålet om straffskuld, seier forsvarar Jørgen Riple.

Riple vil heller ikkje seie noko om relasjon mellom sikta og fornærma.