Fryktar elg kan gå til angrep på små barn i byggefelt

Ei elgku og kalven hennar har skapt reine folkevandringa til byggefeltet på Nordmøre dei siste dagane. Mange vil ha eit glimt av dei to elgane som har slått seg ned i ein privat hage sidan før helga.

Der har dei forsynt seg med blad og bær frå hagehekken til Wenche Weiset Kolstrøm.

Måndag ettermiddag sprada elgkua rundt i fleire oppkjørslar, og raga godt i terrenget mellom garasjer og bilar.

No er Kolstrøm uroleg for at elgkua skal gå til angrep på ein av dei skuelystne.

– Han er råskummel egentlig, for han har kalv. Ungane prøvar å klappe han, og det er ikkje heilt heldig. Det er skummelt å gå mellom, seier ho.

– Forstår ikkje folk at det er farleg?

– Nei, eg trur ungane må få streng beskjed heimafrå, rett og slett, om kor farleg det eigentleg er, seier ho.

For like ved hekken går skulevegen til ungane i området. Det kan bli dramatisk om nokon kjem for nært dei store dyra.

Ber folk halde seg unna elgen

Ein av naboane i byggefeltet har måndag ettermiddag patruljert området, for å halde vakt og jage vekk nysgjerrige folk.

Svein Øyvind Kolstrøm meiner folk må halde seg på god avstand.

– Det var nesten sirkus her tidlegare i dag. Eg skjønnar at at dette ikkje er noko folk får sjå ofte, men det kan skape ekle situasjonar. Vi er redd for at folk utset seg for unødvendig fare, seier han.

Politi og viltnemnd har ikkje gripe inn

Kolstad ringde politiet og fortalte om situasjonen måndag ettermiddag. Då blei han vist vidare til viltnemnda i kommunen.

Det er viltnemnda som eventuelt må gripe inn dersom det skal settast i verk tiltak for å jage dyra vekk.

Medlemmer i viltnemnda er tilbakehaldne med kommentarar, og har førebels ikkje stilt til noko intervju med NRK om situasjonen.

– Eg er livredd

Wenche Weiset Kolstrøm er redd, men synest også det har vore stas med to elgar i hagen. Ho har aldri før sett slike firbeiningar på Frei. Mange har vore innom for å ta bilde av elgane i hagen.

Men no håper ho den stikk til skogs før det skjer noko meir dramatisk.

– Eg er livredd, vi prøvar å skremme den bort, seier ho.