Ålesund utvida skjenketida – mot utestadenes vilje

Kommunestyret i Ålesund styrer med meir enn regnbogeflagg.

I dag bestemte dei at ølkranene i byen skal få vere opne til klokka 03:00.

På tvers av ønsket til politiet – og bransjen sjølv.

Vil ha nasjonale skjenkereglar

– Dette er merkeleg når nesten heile bransjen har sagt at me ikkje ønsker å utvide skjenketida, sa Synnøve Sandnes ved Terminalen før vedtaket blei gjort.

Ho meiner er det er fleire ulemper knytt til ei endring av skjenketidene. Blant anna har dei nesten ingen omsetning etter klokka 02.00.

– Samtidig er det utfordrande å få folk til å jobbe endå lenger. Det gjer det vanskeleg for oss å skaffe personale.

Ivar Breivik driv fleire utestader i Ålesund, og synest avgjerda til politikarane er feil.

– Mitt personell har vore klar på at klokka to held. Me ser ingen grunnlag til å ha opent til klokka tre, sa han med tanke på omsetninga deira.

Breivik ønskjer at det skal vere ein nasjonal skjenkeavgjerd.

– Det handlar om å få føreseielegheit. I fire år kan du halde opent til klokka tre, og så dei neste åra kan du halde opent til klokka to.

• I 2016 blei det bestemt at utestadane i Ålesund skulle gå frå å halde opent til klokka 03:00, til klokka 02:00. Også da var det delte meiningar.

– Meir vald og krim

Politiet i byen har sterkt fråråda endringa, sidan dei trur at utviding av skjenketidene vil føre til meir ungdomskrim, meir vald og uro på nattetid.

Det var fleirtalet ved Høgre og Frp i spissen som gjorde vedtaket.

– Det er pussig at «lov og orden-partiet» Frp ikkje høyrer på politiet her, sa Sindre Nakken i Ap.

– Makt frå politikarane

– Det er frivillig å halde opne, og når det gjeld vald og krim er det nokre få som øydelegg for mange. Dei fleste i Ålesund er lovlydelege, sa Gunnar Krüger i Høgre.

– Dette handlar om fridom til folket, la Lars Mikael Løvold i Frp til.

– Trur de ikkje folk flest har fått i seg nok klokka 2 om natta?

– Innbyggjarane i Ålesund klarer å styre dette heilt fint på eigenhand.

– Politiet trur det blir meir vald og ungdomskriminalitet. Kva inntrykk gjorde desse argumenta?

– Dette handlar også om å ta makt frå politikarane og gi den tilbake til innbyggjarane og næringslivet sjølv, seier FpU-nestleiaren.