196 studentar fekk eksamen annullert

– Når studentar har eksamen som krev at vi veit at dei ikkje har samarbeidd, blir eksamenane deira dessverre annullerte, seier kommunikasjonsdirektør ved Universitetet i Agder Øivind Dagsvik Eskedal.

Han forklarer hendinga som førte til at 196 studentar ved universitetet får eksamen annullert.

Årsaka er at brannalarmen gjekk i nokre av bygga på Campus Kristiansand fredag.

Alarmen gjekk like etter klokka ti.

– Ein feil

Eskedal seier alarmen kom av ein feil.

– Det var rett og slett ein feil som er knytt til ombyggingsarbeid i gamle lokale. Ein skulle kople til ein brannalarm som hadde vore kopla ut i samband med bygging. Då gjekk brannalarmen med ein gong.

Universitetet beklagar det som har skjedd.

– Er det noko vi ønsker, er det at studentane skal ha gode føresetnader og føreseielege eksamenar, seier Eskedal.

– Korleis blir vegen vidare for studentane som er råka?

– Studentane får i dag informasjon om kva dette betyr og kva rettar dei har. Så vil vi følgje dei opp så snart som mogleg med ei ny tid for eksamen.