Skriftekspertar om monogrammet til Märtha: – Bokstavane er amatørmessig forma ut

Det var mange som sperra opp auga då prinsesse Märtha Louise og Durek Verrett lanserte sin eigen rosa gin sist veke. Både juristar og avhaldsrørsla reagerte.

Heller ikkje skriftekspertar er begeistra.

For på etiketten var det teikningar av norske bær og sommarfuglar – og eit rosa monogram sett saman av «M» og «D».

– Eg har inntrykk av at bokstavane er amatørmessig forma ut. Både M-en og D-en avvik såpass mykje frå normative bokstavar at dei knapt kan gjenkjennast, seier Christopher Haanes.

Han blir omtalt som Noregs fremste kalligraf – og har mellom anna teikna diplomet til Nobels fredspris.

Måndag ettermiddag skriv Märtha Louise på Instagram at monogrammet symobliserer kjærleiken mellom dei, og at dei har hatt eit tidlegare saman i Egypt.

• Les også: Trur Geiranger har fått prinsessebryllaupet fordi bygda ikkje sladrar

Meiner bokstavane kjem frå ulike tidsepokar

Heller ikkje studieleiar i grafisk design på Høyskolen Kristiania, Fredrik Eive Refsli, er overtydd, når NRK viser han monogrammet.

– M-en og D-en står i ein forstyrrande nesten-symmetrisk komposisjon, og den gotiskinspirerte bokstavforma på D-en kjem frå ein annan tidsepoke enn den drakestilliknande utføringa til M-en, seier han.

Han peikar også på det han kallar handverksmessige detaljar, at monogrammet ikkje er like tjukt overalt, og at formene kurvar seg ulikt mellom dei ulike elementa.

Ber dei blåse i andre meiningar

Natalie Rørvik oppfordrar brudeparet i Geiranger til å blåse i kva andre seier. Ho skal også gifte seg same dag som Märtha Louise og Durek, 31. august.

– Så lenge det betyr noko for dei, så må dei berre gjer det dei vil. Det er i alle fall det vi gjer. Vi lar oss ikkje påverke av andre, det er vår dag, seier ho.

Det komande brudeparet i Gjemnes har også brukt monogram på invitasjonane sine. Sjølv synest ho dei er finare enn det rosa som prinsesse Märtha Louise og Durek Verrett har valt.

– Alle vil gjerne pirke på andre. Dersom folk tenkjer litt meir på sitt eige, så blir det bra, slår ho fast.

• Les også: Vil du sjå private bilde av kongefamilien? No opnar dei sine private fotoalbum.

For spesielt interesserte

Tone Aure Strand driv firmaet Kortshop i Ålesund og leverer kort og trykksaker til 1500 brudepar i året.

– Det er veldig sjeldan folk ber oss om å lage monogram. Folk vil ha det meir minimalistisk, gjerne reine linjer, ikkje så mykje løkker og illustrasjonar som før, seier ho.

• Les også: Helsedirektoratet opprettar tilsynssak etter omstridt prinsesse-gin

Eksempel på monogram for eit brudepar, som Kortshop har laga. Her er det kanskje Astrid og Marius som har funne saman.

Kanskje ei Caroline og ein Trygve som ønskte ein bladkrans rundt monogrammet til bryllaupet.

Kan det vere Knut og Sigurd som har funne saman?

Evy og Nils-Bjarte er kanskje glade i blomster?

Aisha og Targit har funne kjærleiken.

Kanskje eit par som ønskte litt schwung over mongrammet.

Monogram i grønt.

Strekbokstavar til eit bryllaup.

– Verkar tilfeldig

Christopher Haanes seier bokstavane i monogrammet til prinsesse Märtha Louise og Durek Verrett har «utstikkarar» og slynger som verkar tilfeldige. Han peikar også på at M-en er langt større enn D-en, og lurer på kva som er grunnen til det.

Han seier det er utfordrande å seie korleis monogrammet burde vore teikna, men samanliknar det med dårleg framført musikk – eller mat.

– Eg spøkar ofte med at eg skulle ønskje ein blei fysisk dårleg av svakt forma ut bokstavar, slik ein blir av bederva mat, seier han.

Pressefolka til prinsesse Märtha Louise og Durek Verrett vil ikkje svare på kven som har laga monogrammet. Dei ønskjer ikkje å kommentere kritikken.