Russ avskilta RBK-buss

– E det itj typisk Molde, spør bussjåfør Bente og rister på hovudet.

Ho køyrer bussen til Rosenborg, og står no utan skilt på bakenden.

På eit bilete med høg Molde-sirkulering på nettet sit ein kar i russedress og held bilskiltet.

Slepp å overnatte

Bussjåfør Bente fortel at det er første gong noko slikt skjer med RBK-bussen, men at dei fleire gonger i Molde har blitt nedklistra av klistremerke.

– Må RBK-spelarane bli igjen i Molde til bilskiltet er funne?

– Nei da, me har skilt framme også. Men politiet seier dei håpar at det skal dukke opp i løpet av dagen.

Skiltet forsvann i løpet av natta, da bussen stod parkert utanfor hotellet Seilet.

Politioppbod

Store politistyrkar var ute i Storgata i Molde i lang tid før «hatoppgjeret» tok til.

Men det var ikkje det forsvunnede skiltet dei leita etter.

– Nei, det har me ikkje høyrt om, seier ein av politifolka.

Det blei meldt om høgt aggresjonsnivå hos fleire supportarar allereie fleire timar før kampen.

På operasjonssentralen har dei heller ikkje los på skiltet.

– Forholdet er meldt av busselskapet, og det hadde vore hyggeleg om skiltet hadde dukka opp, seier politiets operasjonsleiar Jens Dahl.

Kanskje heng det no i ei russelue.