Reisebyrå: 155 nordmenn er evakuerte ved skogbrann på Kreta

– Helikoptera flyg over her no og prøvar å avgrense brannen, fortel Trond Hågensen til NRK.

– Det er så mange ferieturistar her, og alle står på gata.

Hågensen seier det var ein Lidl-butikk som tok fyr og blei evakuert onsdag ettermiddag, og at brannen spreidde seg til terreng likevel.

– Røyken ligg over heile byen. Det var vanvitig med røyk. Politiet står her med munnbind på seg og dirigerer trafikken.

Landssjef i Ving Norge, Marie-Anne Zachrisson, seier at dei har 155 kundar på tre hotell i området. Desse er no evakuerte og står på gata, seier ho vidare.

– Sjølve brannen har oppstått ved ein Lidl-butikk. Difor har vi prata med kundar som er råka, fortel ho til NRK.

– Det siste no er at styresmaktene framleis ikkje har full kontroll på brannen. Så vi følger nøye med på kva for råd vi får.