Sylvia (30) sa opp finansjobben - lever av å springe fjelløp

Eit fullt maraton på 42.195 meter på grusstigar gjennom den baskiske fjellheimen, der heile 2700 høgdemeter må forserast frå den vesle byen Zegama over fjellet Aizkorri, og så ned og tilbake til Zegama.

For Sylvia Nordskar var gleda nærast ubeskriveleg da ho kryssa målstreken som fyrste kvinne søndag. Det verkelege beviset på at eit par utradisjonelle val det siste halvanna året har gjeve utteljing.

– Eg trur eigentleg ikkje eg hadde drøymt om noko så stort. Alt fungerte optimalt. Og eg kjenner at det er skikkeleg gøy å sjå at den treninga eg har lagt ned, og alt eg har investert i å bli betre dei to siste åra, gjev avkastning.

Hoppa i det

For det er ingen tvil om at Nordskar har satsa alt på å få det til det ho nettopp har gjort.

1. februar i fjor sa ho opp økonomijobben sin i IT-selskapet Cognite for å satse for fullt på fjelløping. I vår flytta 30-åringen Nordskar så ned til Chamonix i Frankrike for å kunne legge best mogleg til rette for satsinga.

Det er vel ikkje særleg tvil om at valet hennar er litt utanom det vanlege. Men draumen om toppidrettslivet har ho alltid hatt.

Ho har satsa på langrenn, men så bestemte ho seg for å studere. Ho enda opp med ein MBA, eller master i økonomi om du vil, frå Universitetet i Denver, USA.

Så fekk ho seg fyrst jobb som revisor i PWC, før ho byrja som finanscontroller i eit IT-selskap på Fornebu i Oslo.

Heile vegen gjennom arbeidslivet brukte ho mykje tid på trening. Spesielt i fjellet har ho kjent seg heime.

Og gjennom både studier og karriere har ho hatt ein underliggjande draum: å satse på toppidrett.

– Eg tenkjer at eg skal prøve å gjere det beste ut av det livet eg har. Og når eg har fått på plass ei solid utdanning, og fem år med mykje arbeid og relevant arbeidserfaring, så har eg på ein måte bygd grunnmuren.

Da var det berre å hoppe i det. Ho sa opp jobben som finanscontroller, og gjekk «all in».

Og etter å ha levd som toppidrettsutøvar i Noreg eit års tid, så klinka ho til og fullførte ein annan draum ho også har: flytte livet sitt til fjelløp-paradiset Chamonix i Frankrike.

– Eg har ikkje angra ein einaste dag på valet eg har tatt. Dette er eit minne for livet, seier Nordskar.

– Folk følger med

Men utradisjonelle val er ikkje berre ein dans på roser. For med store endringar, kjem også presset.

– Det er fleire som kunne drøymt om å leve av toppidrett, og eg trur, i alle fall for min del, så er jo den største frykta det at du skal feile, seier ho til NRK.

Ho innrømmer at det har vore skummelt å ta steget fullt ut i såpass vaksen alder. Ho også har kjent på at folk dømmer ho for vala hennar.

– Du veit jo at folk følger med og ein tenkjer: «Nå har du slutta i jobben, så da er sjansen mykje større for å ta mange steg». Men det er jo ikkje alltid at det går.

Sigeren i helgas løp var på mange måtar eit bevis på at ho verkeleg har etablert seg i verdstoppen. Det imponerer også NRKs friidrettskommentator Jann Post.

– Det er ein stor siger. Eitt av dei verkeleg store fjelløpene som har høgast prestisje. Det er nok hennas livs største idrettsaugneblink til nå. Folk er utruleg tett på. Det er litt sånn Tour de France-stemning – berre i fjelløp-verda.

Han skjønar godt at Nordskar har kjent på presset når ho har teke eit såpass drastisk val som å seie opp jobben og flytte utanlands.

– Det set litt ekstra press på ein idrettsutøvar etter å ha teke desse vala. Ein kjenner at ein må rettferdiggjere det valet ein har teke. Det kan skape eit prestasjonspress som ikkje er heilt heldig. Men eg tykkjer det er kult at ho gjer det. Kva er eit år eller to i ein idrettsutøvars liv? Jobbe kan dei gjere nok resten av livet, seier Post.

Spanjolen Kilian Jornet, som er busett i Romsdalen i Noreg, vann herreklassa i same løp som Nordskar vann. Han har tidlegare hatt fleire spinnville prosjekt. Mellom anna dette:

– Kjempestort i Europa

Nå ligg på mange måtar fjelløp-sirkuset framfor føtene hennar. For Sylvia Nordskar fortel om gode avtalar i denne manesjen.

I samtale med NRK deler ho ope om kva som er mogleg når ein fyrst er inne i verdstoppen i denne idretten. Da får ein ofte alle kostnader dekka i forbindelse med løp - reise– kost og losji. I tillegg kjem premiepengar og bonusar frå sponsorar. For sigeren i Zegama-Airkozzi maraton vann ho 3000 euro, eller om lag 34.000 kroner.

– Det er god økonomi i desse løpa?

– Ja, sporten er kjempestor i Sør-Europa. Eg trur folk i Noreg ikkje heilt veit kor stor idretten er. Det er også fleire løp der ein blir betalt for å kome. Det er ganske bra økonomi i desse løpa ja, seier Nordskar.

Nordskar er også tydeleg på at ho har vore heldig på vegen dit ho er nå. For utanfor løpesesongen i vinter fekk ho arbeide fleksibelt hjå sin tidlegare arbeidsgjevar PWC.

Sylvia Nordskar er den fjerde nordmannen som vinn det prestisjefylte fjelløpet. Tidlegare har Yngvild Kaspersen, Stian Angermund og Eli Anne Dvergsdal vunne løpet.

– Det er ein dag eg aldri kjem til å gløyme, seier ein smilande Sylvia Nordskar til NRK.

No ventar ein tur heim til Noreg, fyrst i bryllaup til broren, før ho set nasen mot fjellgarden Glittersjå i Murudalen i Sel kommune, der foreldra hennar bur.

Men så er det fullt fokus mot neste løp i slutten av juni: Mont-Blanc maraton.

– Da er eg på heimebane. Det blir viktig å ha is i magen når ein kjem inn med siger frå førre løp. Løypa passar meg bra – eg trur nok det er eit av mine favorittløp, seier Nordskar.