Sikta for vald: – Frykteleg lei seg

– Han vedgår straffskuld og er frykteleg lei seg for det som har hendt, seier forsvarar og advokat Erik Johan Mjelde til NRK.

Mannen i 20-åra er sikta for eitt tilfelle av kroppsskade og to tilfelle av kroppskrenking mot to menn og ei kvinne.

– Politiet har fått innhenta video av hendinga som viser grov, uprovosert vald, seier aktor og politiadvokat Elisabeth Siqveland Morstøl.

Ho bad om fire veker varetektsfengsling for den sikta då det var fengslingsmøte i Hordaland tingrett sundag.

– Me meiner det ligg føre gjentakingsfare på bakgrunn av sikta sin historikk og situasjonen no, i tillegg til sjølve valdshendinga og det potensialet, seier Morstøl.

Sikta skal bli kjent med rettsavgjerda i løpet av dagen.

– Viser grov vald

Natt til 18. mai fekk eit vitne med seg valdshendinga i Strandgaten i Bergen, og filma episoden.

– Eg tenkte kanskje at eg var vitne til eit drap, sa vitnet til NRK laurdag.

NRK åtvarar om sterke bilete i videoen:

Etter klokka 01.30 slo mannen i 20-åra først ned ein mann i 30-åra. Deretter slo han ned ein mann i 60-åra.

Mannen i 60-åra blei ifølge vitnet liggande på bakken medvitslaus i ti minutt, før han kom seg opp og blei frakta til sjukehus.

– Det som går fram av videoen, er ei alvorleg valdshending der ein meiner at utfallet for fornærma kunne vore meir alvorleg. Det viser grov vald, så vi ser alvorleg på saka, seier Morstøl.

Den fornærma mannen i 60-åra blei utskriven frå Haukeland sjukehus laurdag kveld, og politiet har gjort eit telefonavhøyr med vedkomande.

– Forferdeleg lei seg

Forsvarar og advokat Erik Johan Mjelde seier klienten hans erkjenner siktinga fullt ut.

– Han har sagt at han har gjort det, han har sett videoen. Han er forferdeleg lei seg for det han har gjort, seier Mjelde.

Forsvararen seier at den sikta står «i ei stor personleg krise», og at han opplever det han har gjort som uforståeleg.

– Han erkjenner fullt ut det han har gjort. Han vil stå og ta ansvar for det. Betale erstatning til fornærma viss det blir kravd, seier Mjelde.

Hendinga meiner han var ei situasjonsbestemt handling som ikkje er knytt til eit handlingsmønster eller til ei gjentakingsfare.

Forsvararen seier den sikta mannen ønsker hjelp. Han meiner dette er noko han ikkje vil få i fengsel, og bad om at retten vurderte kvar sikta får best mogleg hjelp.

– Og vurderer om overføring til psykisk helsevern kan vere ei moglegheit. Eventuelt at varetektsperioden settast ned til 14 dagar i staden for fire veker, seier Mjelde.

Tidlegare domfelt for vald

Ifølge politiadvokat Linn Mari Søfteland er det ingen relasjon mellom den sikta og den fornærma mannen i 60-åra.

Det er ein relasjon mellom den sikta og dei to andre fornærma i saka, men Søfteland har ikkje villa utdjupe kva relasjon det er snakk om.

Det er ikkje utnemnt bistandsadvokat for dei fornærma. Søfteland seier at det blir mannen i 60-åra som eventuelt får dette.

Den sikta er tidlegare domfelt for valdshendingar.

– Då dreidde det seg om to kroppsskadar og ei kroppskrenking, som han blei dømd for i januar 2020, opplyser Linn Mari Søfteland, jourhavande politiadvokat.