Jorda slår ny varmerekord: Tre historiske klimasøksmål blir avgjort

For tiande månad på rad blir det målt rekordhøg temperatur på jorda.

I mars var den globale snittemperaturen 14,14 varmegrader. Dermed slo årets mars månad førre rekord frå 2016 med 0,1 grad.

Det viser ein rapport frå EUs klimaovervåkningsteneste C3S. Også verdshava hadde rekordhøg temperatur i mars.

Visedirektør for C3S, Samantha Burgess, meiner at raske kutt i klimagassutsleppa er det som må til for å stanse ei ytterlegare oppvarming.

Klimasøksmål

Rapporten kjem same dag som fleire viktige avgjersler er venta i tre historiske klimarettssaker i Den europeiske menneskerettsdomstolen i Strasbourg.

Det eine søksmålet er retta mot Sveits. Fire kvinner i 70-åra skuldar landet for å unnlate å redusere klimautslepp i tilstrekkeleg grad.

Kvinnene meiner det bryt med deira menneskerettar, ettersom stadige hetebølger påverkar deira rett til liv og helse.

Det andre søksmålet er retta mot Frankrike. Ein tidlegare fransk borgarmeister i Grande-Synthe meiner landet må ta meir ansvar for hetebølgene i landet.

Den tidlegare borgarmeisteren skuldar også landet for å ikkje gjere nok for å hindre havstiginga, som han meiner kjem som følge av manglande klimakutt.

Grande-Synthe er eit lågtliggande kystområde som er sårbart for havstiging.

Ungdom saksøker 33 land

Det tredje søksmålet er retta mot Portugal. Seks portugisiske ungdommar har klaga inn fleire europeiske land til Den europeiske menneskerettsdomstolen, mellom anna Noreg.

Bakteppet er skogbrannane som har ramma Portugal, men søksmålet famnar 33 land.

I søksmålet står det at deira rett til liv, privatliv og familie, har blitt krenka etter fleire år med ekstrem heite og skogbrannar i landet, ifølge Financial Times. Dei skal ha blitt hindra i å gå på skule og forlate heimane sine, i tillegg til å slite med å sove når gradestokken har nådd 40.

Alle dei 33 landa er saksøkte for å bryte med FNs menneskerettar.

Høyr Utanriksredaksjonens podkast: