– Funn!
Ei svart jakke ligg på bakken ved ein gardsveg i Vikedal på Haugalandet. Kan han tilhøyre den sakna personen?
Arne Hovland frå Haugesund Røde Kors tar bilde av jakka og finn fram ei iPad-liknande sak.
Der markerer han funnet i eit kart og gir beskjed på sambandet.
– Dette systemet vil definitivt redde liv, seier Glenn Helge Bårdsen i Karmøy Røde Kors.
Dette er heldigvis berre ei øving, men ofte er det alvor. I fjor registrerte Hovudredningssentralen (HRS) 1441 leiteaksjonar etter sakna personar på land.
- I fjor haust blei ein gut funnen død etter å ha vore sakna i to døgn. Over 1000 personar var med på å leite etter Torjus (7).
Systema snakkar ikkje saman
Fleire etatar og organisasjonar er involverte i slike leiteaksjonar, blant dei Røde Kors, Norsk Folkehjelp, politiet og Heimevernet.
Fram til nå har enkelte av dei hatt systema og karta sine. Ein måtte derfor dele på kartreferansar og så leite dei opp. Dette skapte ein del unødig rot og forseinkingar. Og når nokon er sakna, tel gjerne kvart minutt.
Men nå kan alle jobbe i same kartsystem.
– Alle får dei same spora inn, og vi kan sjå alle som deltar i leiteaksjonen. Så viss nokre mannskap har problem, ser vi med ein gong der dei er og kan sende hjelp til dei, seier Bårdsen.
Systemet blir nå prøvd ut i Sør-Vest politidistrikt. Deretter skal redningsfolk i resten av landet lærast opp.
– Når ein så er klar, blir systemet i bruk tatt i reelle aksjonar. Ambisjonen vår er i løpet av året, seier Per Olaf Torkildsen i HRS.
HRS har jobba med å utvikle systemet sidan 2019.
Ser dei utan oppdrag
Dei som leier øvinga i Vikedal, har sett seg inn i ei brakke. På to store skjermar er leiteområdet delt inn i sektorar etter kor sannsynleg det er å finne personen.
Leitemannskap, ATV-ar og dronar er markerte i kartet. Det er også lett å sjå kven som ikkje har noko å gjere.
– Dette gjer verktøyet bra. Vi har oversikt over når folk er i gang eller står og ventar på oppdrag, seier aksjonsleiar for øvinga, Kristoffer Handeland i Sauda Røde Kors.
– Det ser lovande ut, men det står jo att å lokalisere vedkommande, seier han.
Men etter nokre timars leiting finn leitemannskapet den sakna «personen» i Vikedal.
- Nokre leiteaksjonar er avhengig av helikopter, men dei nye flymaskinene kan få trøbbel i høgfjellet.
Publisert 14.05.2024, kl. 06.20