I ei oppdatert melding skriv Utanriksdepartementet at det kan vere auka risiko for eit iransk angrep mot Israel dei kommande dagane.
UD viser til informasjon frå det amerikanske utanriksdepartementet som er referert i israelske medium.
Sidan Hamas sitt angrep på Israel 7. oktober i fjor har UD sitt råd til norske borgarar vore at dei ikkje bør reise til Israel med mindre det er strengt nødvendig.
– Angrepet på Israel frå Hamas i Gaza 7. oktober 2023 har forverra tryggleiken i landet. Situasjonen i Israel er alvorleg og uføreseieleg, skriv UD.
USA: – Reell trussel
– Eit mogeleg iransk angrep er ein reell trussel, seier talsperson for president Joe Biden sitt nasjonale tryggingsråd, John Kirby.
USA har bedt fire land i Midtausten om å snakke med Iran for å roe ned den spente situasjonen.
Utanriksministrane i Saudi-Arabia, Dei sameinte arabiske emirata, Qatar og Irak er alle blitt kontakta av USA sin spesialutsending til Midtausten, Brett McGurk.
Bakgrunnen er at sju medlemmer i den iranske revolusjonsgarden blei drepne i eit angrep mot det iranske konsulatet i Damaskus i Syria 1. april.
Iran meiner Israel står bak angrepet. Den øvste leiaren i Iran, Ali Khamenei sa onsdag at Israel må og vil bli straffa for angrepet på det iranske konsulatet.
USA har av tryggingsomsyn avgrensa områda der diplomatane deira i Israel kan ferdast.
Israel vil svare direkte på eit angrep frå Iran, sa forsvarsminister Yoav Gallant torsdag, etter å ha snakka med den amerikanske kollegaen sin, Lloyd Austin.
UD: – Ver forsiktige!
I reiserådet skriv UD at tryggingsnivået er heva i Israel, først og fremst i områda nær Gazastripa, men også ved Golan på grensa mot Syria. UD ber folk vere forsiktige i grenseområda mot Egypt og Libanon.
Departementet oppfordrar også norske borgarar til å halde seg oppdaterte gjennom lokale medium, gjere eigne tryggingsvurderingar og følgje råd frå lokale styresmakter.
– Dersom demonstrasjonar og valdelege samanstøytar bryt ut, bør du forlate staden straks. Der det er avgrensa høve til å forlate området kan butikkar eller restaurantar brukast som mellombels tilfluktsstad, ifølgje UD sitt råd.
Publisert 12.04.2024, kl. 16.10 Oppdatert 12.04.2024, kl. 16.44