Kommune må betale million-erstatning til tre sysken - Høgsterett vil ikkje behandle saka

3 hours ago 1

«Anken fra Ulstein kommune tillates ikke fremmet» er konklusjonen frå Høgsterett. Dermed er det sett punktum for ein årelang rettsstrid.

Dette betyr at Ulstein kommune må betale 6,6 millionar i erstatning til tre sysken som blei mishandla av far sin då dei var små, slik lagmannsretten bestemte tidlegare i år.

Syskenflokken har i årevis hevda at kommunen visste om mishandinga og burde ha gripe inn.

– Anken frå kommunen er nekta fremja, og våre klientar får endeleg utbetalt erstatninga si. Det er ein gledens dag. Alle fem har fått millionerstating, skriv avdokaten til syskenflokken, Mette Yvonne Larsen.

Kollegaen hennar, Tonje Lilaas Larsen, seier at ho så langt berre har fått tak i Margareth Øvrelid.

– Ho er veldig letta og glad for at det no blir sett puktum i saka.

– Overraskande

Kommunestyret bestemte seg tidlegare i år for å anke, men Høgsterett vil altså ikkje ta inn ankesaka:

«Utvalget finner enstemmig at det ikke er grunn til å oppheve lagmannsrettens dom i utvalget etter tvisteloven § 30-3 andre ledd, og at verken avgjørelsens betydning utenfor den foreliggende sak eller andre forhold tilsier at saken blir fremmet for Høyesterett, jf. tvisteloven § 30-4.»

– Det er overraskande, seier kommunen sin advokat Terje Marthinsen. Han har førebels ikkje lese avgjerda og kan ikkje kommentere saka nærare.

I avgjerda frå Høgsterett kjem det også fram at Høgsterett avviser dei tre organisasjonane som ønskte å vere partshjelparar i ei eventuell sak. Det var Trafikkforsikringsforeningen (TFF), Yrkesskadeforsikringsforeningen (YFF) og KS - Kommunesektorens Organisasjon.

Advokat Terje Marthinsen står på talarstolen i rettssalen. Han har skjorte, slips og ei svart advokatkappe på seg. Han har briller og les i eit dokument medan han gjer seg klar til eit framlegg.

– Vi meiner at slike saker må bli behandla av rettsvesenet, likt over heile landet. Det viktigaste for oss var å få ei snarleg avklaring i ankespørsmålet, sa ordførar Stian Skorgen Scheide (H) tidlegare i år.

I ei pressemelding skreiv kommunen då at dei hadde fått klare tilrådingar frå forsikringsselskapet og advokaten til kommunen om å anke.

Syskena saksøker kommunane
I 2018 saksøkte syskena, ved hjelp av advokat Mette Yvonne Larsen, Hareid og Ulstein kommune og bad om erstatning.
Er saka forelda?
Tingretten sa då at dei ikkje ville behandle saka fullt ut før dei hadde svar på om ho var forelda - altså at det som hadde hendt var for lenge sidan til at retten kunne seie noko om det.
Ja!
I oktober 2020 kom retten fram til at saka var forelda.
Øvrelid-syskena anka avgjerda til lagmannsretten.
Ikkje forelda likevel
Lagmannsretten meinte våren 2022 at saka ikkje var forelda og at syskena dermed kunne be kommunane om erstatning.
Høgsterett sa nei
Hareid og Ulstein kommune anka avgjerda til Høgsterett. Dei sa likevel nei til å sjå på saka, fordi ho ikkje var prinsipiell nok.
Ei full rettssak
Dermed vart erstatningssaka fullt ut behandla i Frostating lagmannsrett like før jul 2022 – fire år etter søksmålet kom.
Josef Benoni Ness Tveit
Dom i lagmannsretten
Dommen i Frostating lagmannsrett kom i mars 2023: Dei to yngste syskena fekk erstatning frå kommunane. Dei tre eldste fekk ikkje erstatning. Avgjerda blei anka til Høgsterett.
Josef Benoni Ness Tveit
Opphevar dommen
I september 2023 blei det kjent at Høgsterett opphevar heile dommen frå lagmannsretten for dei tre eldste syskena. Dei fekk dermed opp saka si til ny behandling i Frostating lagmannsrett våren 2024.
Mia Sofie Ytreberg / NRK
Fekk erstatning
I juni kom Frostating lagmannsrett til at også dei tre eldste syskena hadde rett på erstatning. Dei fekk omlag 6,6 millionar.

Vaks opp med valdeleg far

Barndommen var eit mareritt for syskenflokken på fem. Dei vaks opp på Sunnmøre på 50- og 60-talet med ein valdeleg far som plaga dei fysisk og psykisk. Sjølv om «alle» visste kva som foregjekk, opplevde dei at ingen vaksne greip inn.

Dei to yngste fekk litt over 4 millionar kroner i fjor vår. I tillegg måtte kommunen betale alle utgifter til rettssakene for dei.

No er det også sett punktum for dei tre eldste.