Ni livstruande skada etter knivangrep: – Trudde det var ein halloween-spøk

Ti personar er sendt til sjukehus etter eit knivangrep på eit tog i England laurdag kveld.

– Ti personar er på sjukehus, og ni av dei skal vere livstruande skada, skriv britisk politi på X.

Det har førebels ikkje kome nokre meldingar om omkomne.

To pågripne

Toget var på veg frå Doncaster til King's Cross i London. Det vart stoppa i Huntingdon, omkring 100 kilometer nord for London.

Der blei to menn pågripne av politiet.

Politiet rykte ut med store ressursar klokka 19.42 lokal tid, få minutt etter at toget hadde køyrt frå Peterborough.

Britisk politi karakteriserer angrepet som «ei større hending». Dei stadfestar òg at kontraterror-politi deltar i etterforskinga.

– Dette er ei sjokkerande hending, og først og fremst er mine tankar med dei som har blitt skada i kveld og familiane deira, seier politioverbetjent Chris Casey ifølge BBC.

Ifølge Casey veit dei førebels ikkje noko om motiv, men seier at etterforskinga forsøker å avdekke dette.

Mykje blod

Eit vitne fortel til Sky News at han såg personar som forsøkte å komme seg unna angrepet.

– Dei var ekstremt blodige, seier vitnet Gavin til kanalen.

Wren Chambers sat på toget då ho høyrde skriking frå ein av dei næraste vagnane. Etter kort tid kom ein mann løpande med eit stort sår på armen.

– Eg trudde det var ein slags halloween-spøk fyrst. Men så ropar han at nokon har ein kniv og at han vart stukken, seier ho til BBC.

Eit anna vitne fortel at han såg fleire blodige passasjerar springe nedover plattforma. Ein av dei, ein mann i kvit skjorte, var «fullstendig dekka av blod», fortel Dean McFarlane til BBC.

London North Eastern Railway opplyser at togtrafikk rundt Huntingdon stasjon er stansa. Det er store togforseinkingar i regionen.

– Djupt urovekkande

Storbritannias statsminister Keir Starmer omtalar hendinga som «djupt urovekkande».

– Den forferdelege hendinga på eit tog nær Huntingdon er djupt urovekkande. Tankane mine går til dei som er råka, og eg takkar naudetatane for innsatsen, skriv Starmer på X.

Statsministeren ber folk i området om å følgje råd frå politiet.

Ordførar i Peterborough og Cambridgeshire, Paul Bristow, sine «tankar og bønner går til alle som er råka», skriv han på X.

Bristow reagerer på «fryktelege scener» som har utspelt seg på toget.

Også styreformann i Det konservative partiet, Kevin Hollinrake, skildrar det som «skremmande scener».

– Mine tankar går til offera og naudetatane som handterer denne saka, skriv Hollinrake på X.

Interessert i utanriks? Høyr redaksjonen sin nyaste podkast-episode: