MDG-byks sikrar Støre «tuttifrutti»-fleirtal

– Det er ei veldig gledeleg måling for oss. Det gir mykje energi dei siste dagane av valkampen.

Det seier Arild Hermstad, partileiar for Miljøpartiet dei grøne (MDG).

Partiet får 7,2 prosent oppslutning på ei fersk måling gjort av Norstat for NRK, Vårt Land og Dagbladet.

Det er det beste resultatet deira på ei NRK-måling – nokosinne.

Viss dette hadde vore valresultatet, hadde partiet sørga for fleirtal til raudgrøn side.

MDG hoppar opp frå 4,7 prosent i NRK si august-måling.

Målinga er gjennomført blant 2000 veljarar denne veka. Dei siste veljarane vart spurde torsdag føremiddag.

Støre vil ikkje spekulera

Hermstad er likevel klar på at han ikkje føler seg trygg før sjølve valresultatet er klart.

– Gitt at det går, kva krav vil du stilla til Støre med eit slikt mandat frå veljarane?

– Me vil kjempa for ein ekte klimapolitikk der me gjer det billigare og enklare å leva miljøvenleg, der me startar omstillinga frå olje over til fornybart. Me må òg gjera mykje meir for Palestina og motverka fattigdom i Noreg, svarar MDG-leiaren.

Arbeidarpartiet får 26,4 prosent på målinga, noko statsminister Jonas Gahr Støre er nøgd med.

– Miljøpartiet dei grøne kan bli størst blant støttepartia dine. Korleis vil du handtera det?

– Det spekulerer eg ikkje i, for det går opp og ned på målingane. Men dei partia som meiner at me ikkje skal ha ei Frp-leia regjering, dei vil finna ut av det. Og det er ei Arbeidarparti-regjering som kan ta det ansvaret, svarar Støre.

– Avhengige av Sp sidan 70-talet

Miljøpartiet er også større enn Senterpartiet.

– Korleis vert det å samarbeida med eit sterkt MDG?

– MDG har samarbeida meir med Høgre og Venstre no i vår i EU-saka. Og om Arbeidarpartiet skal få gjennomslag for statsbudsjetta sine, har dei sidan 70-talet vore avhengige av oss i Sp, svarar Vedum.

Han står fast på at partiet ikkje vil gå med på auka avgifter eller norsk EU-medlemskap.

– Kva seier du til dei som meiner det vert kaos med det som vert kalla «tuttifrutti-fleirtal» på raudgrøn side?

– At Senterpartiet er dei som avgjer kven som får fleirtal. På denne målinga sit me på vippen. Me kjem ikkje til å godta auka avgifter, svarar Vedum.

Lågaste på 16 år

Sjølv om høgresida kunne jubla då resultata frå skulevalet kom, er det nok ikkje noko jubel no.

Krisa held nemleg fram for Høgre, som får 14,3 prosent. Det er det lågaste på ei NRK-måling på 16 år.

– Dette er ei meiningsmåling som er for dårleg for oss, seier partileiar Erna Solberg til NRK.

Ho synest det er gledeleg at både KrF og Venstre er over sperregrensa på målinga – men er klar på at det ikkje er nok.

– Høgre må høgare opp no for at me skal få til det regjeringsskiftet eg trur mange ønsker seg, seier ho.

Frp-leiar Sylvi Listhaug peikar på det same.

– Frp har jo gode tal, men me treng eit skifte for landet. Difor er det så viktig at alle partia på ikkje-sosialistisk side bidrar til å skaffa eit fleirtal, seier ho til NRK.

Men plasseringa over sperregrensa er ikkje trygg for korkje Venstre eller KrF, ifølge Norstat. Feilmarginen gjer nemleg at den reelle oppslutninga godt kan vera under sperregrensa på 4 prosent.