Les opp dommen i rystande sak: – Ein ekstrem belastning

1 month ago 30

Overgrepssakene i Ullensvang:

Kva skjedde med barna i nabolaget?

SJOKKERANDE: Den enorme overgrepssaken har prega lokalsamfunnet i Ullensvang kommune i fleire år. Her frå kommunesenteret Odda. Foto: Ole Enes Ebbesen / TV 2

Publisert 06.02.2025 21:51

Det begynte som uromeldingar til barnevernet. Fleire reagerte på tett kontakt mellom ein mann i 30-åra og den unge nabojenta.

Så eskalerte det til det som er skildra som ein av dei grovaste overgrepssakene i nyare tid i Norge.

Detaljane har vore av så grov karakter at verken TV 2 eller andre medier har skrive utførleg om det barna har fortald om.

Ny dom

Fredag 7. februar klokka 13.00 les lagdommar Carl Petter Martinsen opp domsslutningane til Gulating lagmannsrett.

Då får ein far, ei mor, ein storebror og ein nabomann vita korleis lagmannsretten vurderer bevisverdiene av det i alt tre barn har fortalt om:

At dei utsette dei for gjentekne grove og grenseoverskridande valdtekter.

Alle fire tiltalte nektar straffskuld og seier overgrep aldri har skjedd.

Dette er overgrepssakene i Ullensvang

Ein far, ei mor og ein storebror skal ha etablert eit regime der dei grovt valdtok dei to yngste barna i familien gjennom fleire år. Jenta og guten er høvesvis 12 og 17 år i dag.

Den fjerde tiltalte i saka er ein nabomann i 30-åra som er skulda for å ha valdteke sin eigen son (11) og den jamngamle dottera til dei medtiltalte.

Det er ikkje funne bevis for at nabomannen og familien samarbeida eller visste om kvarandre sine påståtte overgrep.

Alle nektar straffskuld. Dei meiner barna er utsett for påverknad av tilsette i barnevernet og politiet, slik at barna kan ha fått falske minner om overgrep.

Dei skuldar også på kvarandre:

Nabomannen meiner jenta fortel om overgrep ho eigentleg har opplevd heime.

Foreldreparet trur på dottera når ho fortel at nabomannen har forgripe seg på henne.

– Han er svært spent og fryktar fredagen. Men han håpar lagmannsretten ser at det ikkje er grunnlag for domfelling, seier advokat Jan Henrik Høines.

Han forsvarar trebarnsfaren i 50-åra som fekk 21 års forvaring i tingretten.

Mannen meiner heile familien hans uansett er øydelagd for noko «dei aldri har gjort».

Slik vart saka rulla opp

Saka begynte altså med nabomannen i 30-åra. Til politiet fortalde etterkvart ei ung jente om kva mannen hadde utsett ho og sonen hans for.

Under etterforskninga oppdaga politiet at det også var mykje digital kontakt mellom dei to. Det vart difor tatt beslag i faren hennar sin telefon som vart nytta til dette.

Der fann dei urovekkande søkehistorikk. Trebarnsfaren hadde nyleg sona dom for nedlasting av grovt overgrepsmateriale. Difor vart han pågripen på nytt.

Og då begynte den yngste sonen hans å fortelje. Det byrja med skildringar av overgrep frå far under dusjing om morgonen.

Fleire tilrettelagde avhøyr seinare hadde det utvikla seg til skildringar av overgrep der heile familien var involvert.

Storebroren skal ha blitt tvinga med av far og mor, som ifølge aktoratet leia eit «overgrepsregime» i familien gjennom mange år.

Det som skjedde mellom nabomannen, sonen hans og dottera deira skal ha skjedd uavhengig av dette.

Politiet har aldri funne bevis for at dei samarbeida.

Svært konfliktfylt

Den massive ankesaka gjekk for Gulating lagmannsrett i heile fjor haust.

Det er svært steile frontar i saka. Sentralt står spørsmål om vitnepåverknad og utvikling av falske minner.

For, kan barna ha blitt påverka til å forklare seg usant om overgrep og valdtekter?

Er bevisverdien av forklaringane deira svekka på grunn av eit for ivrig barnevern, som attpåtil er kritisert for ikkje å ha gjort nok for å beskytte barna?

Slaktar samtalane barnevernet hadde med barna: – Eigna til å påverka

Nei, meiner påtalemakta og peikar på at barna i så fall har lygd om eigne foreldre gjennom fleire år.

Ja, svarar eit samla forsvararkorps som mellom anna samanliknar barnevernsmetodar med avhøyra av fetteren til Birgitte Tengs.

Lagdommar reagerte på emojiar mellom politi og barnevern: – Aldri sett før

3,5 år i varetekt

Den forvaringsdømde mannen sin forsvarar, Jan Henrik Høines, har omtala etterforskinga mot mannen for «ein kampanje».

– Han har vore i varetekt sidan sommaren 2021. Det er 1311 dagar der han har vore fengsla for noko han seier han aldri har gjort. Belastninga har vore ekstrem.

Også mora til barna, mannens ekssambuar, er svært spent før ho må møte i retten for å høyre dommen mot ho.

– Det er svært krevjande å vente på eit resultat i denne saka. Sjølv om ho forventar frifinning, er det umogleg å førebu seg på korleis fredagen vil bli, seier forsvarar Astrid Aksnes til TV 2.

Storebroren ynskjer ikkje å gi kommentarar til TV 2 før dommen kjem. Han nektar for å ha forgripe seg på søskena sine.

Nabomannens forsvarar, Kai Inge Gavle, har førebels ikkje hatt høve til å svara TV 2.

Les alle sakene frå TV 2 sin dekning av ankesaka i Gulating lagmannsrett hausten 2024.