Macron har snakka med Trump og Zelenskyj

Frankrikes president Emmanuel Macron sa tysdag at han har snakka med USAs president Donald Trump og Ukrainas president Volodymyr Zelenskyj etter eit møte med dei europeiske leiarane tidlegare på dagen.

– Me ønskjer ein sterk og varig fred i Ukraina. For å få til det må Russland avslutta aggresjonen sin, som må følgjast av sterke og truverdige tryggingsgarantiar for folket i Ukraina. Elles er det ein fare for at ei våpenkvile vil enda som Minsk-avtalane. Saman med europearar, amerikanarar og ukrainarar vil me jobba med dette. Det er der nøkkelen ligg, skriv Macron

Han legg til at europearar må investera betre, meir og saman om tryggleik og forsvar. Både i dag og for framtida.

– Arbeidet vil halda fram basert på EU-kommisjonens forslag, både i å støtta Ukraina og i å utvikla og investera i forsvaret vårt, skriv Macron i eit innlegg på plattforma X.

Diskusjonane vil halda fram dei kommande dagane, legg han til.

Felles visjon

Ukrainas president Volodymyr Zelenskyj stadfestar at han har snakka med Macron om tryggingsgarantiar og om å oppnå fred i Ukraina, melder nyheitsbyrået Reuters måndag kveld.

– Me deler ein felles visjon. Tryggingsgarantiar må vere robuste og pålitelege, skriv Zelenskyj på Telegram.

Han legg til at alle avgjerder utan slike garantiar – som ei skjør våpenkvile – fort kan vere ein forløpar til ein ny russisk krig mot Ukraina eller andre europeiske land.

Macron informerte også Zelenskyj om samtalar med andre leiarar, ikkje berre europeiske.

– Me vart samde om å halda konstant kontakt. Viktige saker blir avgjorde, skriv Zelenskyj på meldingsappen Telegram.

Vil gi tryggleiksgarantiar

På eit møte i Paris måndag vart fleire europeiske leiarar samde om at dei er klare til å gi Ukraina tryggleiksgarantiar. Dei åtvara likevel om at det ville vera utrygt å inngå ei våpenkvile utan samtidig å ha ein fredsavtale på plass, melder nyheitsbyrået Reuters.

– Me er klare til å gi tryggingsgarantiar, men detaljane må diskuterast med kvar part, avhengig av kor mykje støtte USA gir, opplyser ein tenestemann etter møtet i Paris måndag kveld.

Danmarks statsminister Mette Frederiksen, som representerte dei nordiske og baltiske landa på møtet, sa at Russland er ein reell trussel mot Europas tryggleik. Ho sa den viktigaste bodskapen frå møtet var behov for opprusting for å hindre at Russland flyttar krigen frå Ukraina til andre land i Europa.