I fjor hadde norske kvalfangarar ein kvote på 1157 vågekval. I alt 11 fartøy deltok og det blei fanga totalt 415 dyr. Det var ein auke i talet fartøy, men ein nedgang i fangst samanlikna med året før.
No har fiskeri- og havministeren fastsett årets vågekvalkvote. Den er sett til 1406 vågekval, som er 249 fleire enn året før. Det skriv Lofotposten.
– Norsk kvalfangst er berekraftig, strengt regulert, og vågekvalbestanden er i svært god forfatning. Noreg brukar effektive og dyrevelferdsvenlege fangstmetodar, og kvalen sitt store fiskekonsum påverkar økosystemet. Kvalfangst bidrar derfor til balanse i havet, seier fiskeri- og havminister Marianne Sivertsen Næss i ei pressemelding.
Det blir opplyst at bestanden av vågekval i Nord-Atlanteren er på over 100.000.
Kvoten er sett med utgangspunkt i utgreiingsmodellar i vitskapskomiteen i Den internasjonale kvalfangstkommisjonen (IWC). Desse har som føremål å sikre ei berekraftig forvalting av vågekvalbestanden.
English (US)