Kina svarar USA med høgare straffetoll

Canada og Mexico fekk sleppe, enn så lenge. Men tysdag morgon har president Donald Trump innført straffetollen han varsla mot Kina.

Denne var mykje lågare enn dei 60 prosenten han lovde under valkampen. Men det har framleis brakt tilbake handelskrigen mellom verdas to største økonomiar.

Det kinesiske finansdepartementet har kritisert den amerikanske presidenten for å «alvorleg bryte med reglane til Verdas handelsorganisasjon».

No er svaret klart: Kina innfører 10 prosent tilleggstoll på amerikansk råolje, gardsutstyr, store motorkøyretøy og pickup-lastebilar, ifølge Reuters.

For den amerikanske naturgass og kolindustrien svir det endå meir. Kina innfører 15 prosent tilleggstoll på desse.

I tillegg innfører Kina eksportkontroll på ei rekke viktige metall og produkt derav: tungsten, tellurium, ruthenium og molybdenum.

Eigentleg skulle USA også innføre straffetollar tysdag mot dei to nabolanda, på 25 prosent. Etter forhandlingar har desse blitt utsette i ein månad.

Varslar gransking av Google

I tillegg varslar Kina at det vil starte ei gransking av den amerikanske tech-giganten Google.

– Fordi Google er mistenkt for å bryte Folkerepublikken Kina sitt lovverk om konkurransereglar, har den statlege administrasjonen for marknadsregulering starta ei gransking, heiter det i utsegna.