Internasjonal storserie tilbydt nær 90 millionar – droppar Noreg

Tidlegare i februar blei det kjent at ein anonym storproduksjon blei tilkjent 88 millionar kroner frå Norsk filminstitutt (NFI).

Dramaserien som gjekk under dekknamnet «Secret Garden», hadde planar om å bruke nær 800 millionar kroner i Noreg. Den søkte om ei refusjonsramme på 200 millionar kroner av Norsk filminstitutt, men fekk tilbod om berre 88 millionar.

Nå har storserien avslått tilbodet og opplyst at dei droppar Noreg som lokasjon for serien.

Kan vere internasjonal storserie

Ifølge Bergens Tidende, som har sett ein post på filminstituttet nettsider, skulle serien skrivast og regisserast av Mike White, medan Mark Kamine og David Bernard er produsentar. Desse har alle tidlegare vore involvert i HBO sin storsuksess «White Lotus».

Den satiriske serien tek for seg luksushotell for rikingar ulike stader i verda.

– Vi blei i praksis tilbodne 11 % av produksjonsramma, det blir for lite i den konkurransen ein har i Europa.

Det seier Tor Arne Øvrebø, som er ansvarleg søkar og produsent i Truenorth, til NRK. Han vil ikkje kommentere rykta om at det var snakk om «White Lotus».

Produksjonen hadde planar om å filme og utføre visuelle effektar og etterarbeid i Noreg.

Opphavleg blei insentivramma for 2025 i sin heilskap tilbode den internasjonale dramaproduksjonen «Secret Garden».

Ettersom denne produksjonen nå har takka nei til ramma, har NFI i staden tilbode den til andre søkarar til ordninga frå same søknadsrunde.

Andre produksjonar med millionstøtte

Blant dei som har fått tilbod om refusjonsramme er spelefilmen «Mile Zero», som er tilboden refusjonsramme på 32 925 000 kroner, dramaserien «Mord i Sogn» er tilbode 10 725 000 kroner.

Norsk filminstitutt tilbyr totalt kroner 66 825 000 i refusjonsramme frå insentivordninga til innspeling av og etterarbeid på i alt sju film- og serieproduksjonar i Noreg.

I eit vedtaksmøte hos NFI, som er behandlande organ for den norske insentivordninga, har det blitt vedtatt å tilby refusjonsramme til tre spelefilmar og fire dramaseriar. Produksjonane planlegg å bruke nærare 270 millionar kroner i Noreg.