I tårer etter ny VM-medalje: – Hadde ikkje trudd dette

– Eg er kjempenøgd etter den sesongen eg har hatt, seier sølvvinnaren til NRK.

Ho held fram:

– Eg er berre veldig glad. Eg hadde ikkje trudd dette for eit halvt år sidan eller gjennom sesongen. Dette sølvet smakar betre enn dei to gulla eg har frå før.

Gyda Westvold Hansen, som har individuelle gull både frå VM i 2021 og 2023, erkjenner at ho har slite i hoppbakken.

– Eg har levert hopp på mykje lågare nivå enn eg gjer i dag. Eg er veldig nøgd med at eg har klart å snu det og er på tur opp igjen, seier den ferske sølvvinnaren.

Slik forklarer ho tårene

Westvold Hansen erkjenner at sølvet har kosta.

– Eg har sikkert trena i fire-fem timar om dagen dei tre siste vekene, så eg er veldig godt nøgd med at det gir utslag i positiv retning.

– Kva ligg bak tårene dine?

– Nei, det veit eg ikkje. Det er mykje glede, og det er ein hoppbakke og ei langrennsløype som skil lite. Eg har lege som nummer 10–15 og slikt etter hoppinga, og vore både to og tre minutt bak. Det å då vere såpass nær gull i dag, det hadde eg ikkje trudd.

Ho tippar at ho hadde rundt 210 i puls før ho hoppa – som siste utøvar i Granåsen.

Trass i at sølvvinnaren sjølv var godt nøgd, så meinte ikkje ekspertane at Gyda Westvold Hansen fekk det heilt til i hopprennet i Granåsen.

– Det er ikkje eit makshopp av Gyda. Eg trur ikkje ho er heilt nøgd, sa NRK-ekspert Magnus Moen etter at sølvet var sikra.

Yuna Kasai frå Japan vart verdsmeister, medan tvillingsøstera Haruka sikra seg bronsen.

Fire på topp 10

Det vart heller ikkje heilklaff for dei andre norske, sjølv om laginnsatsen samla sett var bra.

Marte Leinan Lund låg på andreplass etter langrennet, men enda på 8. plass.

– Eg er eigentleg nøgd. Hoppinga er på rett veg, sa Leinan Lund.

Ida Marie Hagen skuffa i langrennet, og klarte heller ikkje å levere i hoppbakken.

Hagen vart til slutt nummer 10.

– Det er ikkje dette eg trenar for, seier Hagen sjølv etter rennet.

17 år gamle Ingrid Låte hoppa heile 100,5 meter og enda på ein imponerande 9. plass. Låte var nummer 32 etter langrennet.

– Atypisk

Torsdagens VM-renn i kombinert starta med fem kilometer langrenn fellesstart.

Norge gjorde samla sett ein sterk langrennsdel, men rekkefølga på dei norske utøvarane vart annleis enn venta.

Ida Marie Hagen gjorde det svakare enn forventa, medan Gyda Westvold Hansen var best av alle.

– Dette er heilt atypisk. Gyda Westvold Hansen går ifrå Ida Marie Hagen, sa NRK-kommentator Jann Post.

– Ida Marie Hagen er faktisk prega. Ei overraskande utvikling, sa ekspert Torgeir Bjørn.

Hagen enda sju sekund bak Westvold Hansen på femkilometeren. Det betydde ein differanse på 1,8 poeng.

Viste til episode i januar

Kombinertsjef Ivar Stuan meinte Hagen framleis er prega etter disken i Seefeld i januar.

– Eg trur det som skjedde i januar ikkje var så veldig bra, og at det øydelegg for henne, sa Stuan.

– Overraskande at Stuan vel å fokusere på det. Ein må kome seg vidare, kontra Magnus Moan.

Sjølv sa Ida Marie Hagen til NRK at det vart tøft.

– Eg prøvde å gå litt ifrå, men det var ikkje lett. Eg gav det ein skikkeleg sjanse, sa Hagen.

– Ein gullkandidat

Tre nordmenn låg inne på topp fem etter langrennet:

Gyda Westvold Hansen, Marte Leinan Lund og Ida Marie Hagen.

– Ho seglar opp som ein stor gullkandidat, sa NRK-ekspert Torgeir Bjørn om Westvold Hansen.

– Det er eit meisterskapsgen som dukkar opp, og det er sterkt, meinte kombinertsjef Ivar Stuan om Westvold Hansen.

– Eg er best når det gjeld, varsla Westvold Hansen sjølv til NRK.

– Irriterande

Tyske Nathalie Armbruster og Ida Marie Hagen var også involvert i eit uhell i langrennet.

– Armbruster kjem bakfrå, så det er eigentleg hennar ansvar. Men det ser ut som eit typisk løpsuhell, sa Torgeir Bjørn.

– Eg synest det var irriterande, men det er sånt som skjer. Eg forstår jo at det ikkje var med vilje, kommenterte Ida Marie Hagen sjølv.

Gyda Westvold Hansen tok to gull i VM i 2023, eitt individuelt og eitt i blanda lagkonkurranse.

Ida Marie Hagen tok eitt gull den gongen, i blanda lagkonkurranse.

Westvold Hansen vann også eit individuelt VM-gull i 2021.