Gut (8) leika i storefri – datt fleire meter ned fjellskrent

– Det er eit under at dette ikkje blei ei dødsulukke. 

Det seier ei fortvila mor til TV 2, etter ulukka ho meiner aldri burde skjedd. 

Fredag 17. januar fekk ho telefonen alle foreldre fryktar. 

Sonen hennar hadde falt utanfor ein stupbratt fjellskrent på nærmare 8 meter, medan han leika i eit friminutt på skulen i Bergen. 

ULUKKE: Guten falt ned denne skrenten. Han fekk ingen alvorlege skadar. Foto: Sorosh Sadat / TV 2

– Skulen ringde og sa sonen vår hadde slått seg og at ambulansen var på veg. Du gjer deg nokre tankar då. 

Mora er sterkt prega då ho tar TV 2 med til der guten falt ned. Ho ønskjer ikkje stille med namn.

– Først var eg sjokkert. No er eg sint. Det er heilt uforståeleg at eit område som er tilrettelagt for barn, ikkje er betre sikra enn dette, seier ho. 

Nyopna parkanlegg 

Like før jul i fjor opna Bergen kommune ein splitter ny sykkel- og nærmiljøpark nokre meter frå Olsvik skule. 

Her er det fotballbane, sykkelbane og fleire leikestativ. 

Anlegget er bygd berre nokre meter frå ein bratt fjellskrent.

KUNNE GÅTT GALE: Her ser ein skulen, parkanlegget og skrenten som ligg like i nærleiken av kvarandre. Førre fredag heldt det på å gå skikkeleg gale. Foto: Sorosh Sadat / TV 2

Området er inngjerda, men gjerdet har ein opning og ein port rett ut mot den stupbratte skrenten. 

Det var her 8-åringen gjekk ut gjennom opninga i gjerdet, då han gjekk vekk frå lærarane i friminuttet på skulen. 

– Ikkje godt nok 

Det var tilsette ved skulen som såg at guten hadde kome seg på utsida av gjerdet. Han falt før dei rakk handle. 

Ambulansen rykka ut og frakta guten til sjukehus. Han hadde slått seg, men hadde ingen brot eller alvorlege skadar.  

– Barna har eigentleg ikkje lov å vere heilt der borte, men slik er no barn. Dei utforskar, seier Tove Elin Savland, rektor ved Olsvik skule. 

PREGA: Rektor ved Olsvik skule seier det er det verste som kan skje at eit barn blir skadd i skuletida. Heldigvis gjekk det bra denne gongen. Foto: Sorosh Sadat / TV 2

Ho stiller seg bak kritikken til mora om at anlegget ikkje er godt nok sikra. 

– Dette er jo berre eit steinkast frå skulen. Vi tenker jo at når eit anlegg er godkjent, så er det godkjent. Det er ikkje opp til oss å ettergå kva reglane er for sikring hos etat for idrett. 

Savland seier skulen har diskutert om det er noko dei kunne gjort annleis for å hindre at dette skjedde, og om dei burde hatt fleire vakter ute ved gjerdet. 

– Men kva når klokka ringer ut og lærarane går heim? Kven passar på då? Det kan ikkje vere sånn, seier mora.  

REAGERER: Denne parken er bygd på kanten av ein bratt skrent. Rektor og mor til elev ved Olsvik skule meiner tryggingstiltaka ikkje er gode nok. Foto: Sorosh Sadat / TV 2

Kommunen skal ha dialog

– Først av alt er vi veldig glade for at det etter omstenda står bra til med guten, skriv direktør Torbjørn Iversen i etat for idrett i Bergen kommune.

TV 2 har stilt fleire spørsmål om sikringa. Iversen forklarar at nærmiljøanlegget på Olsvik grensar mot fri natur og at det er etablert «i henhold til norsk standard».

 I rammeløyvet for prosjektet var dette naturområdet skildra som eit svært viktig nærturterreng.

ÅTVARING: Ved parkouranlegget, eit stykke frå skrenten, er det eit skilt som åtvarar mot å la barn under 8 bruke anlegget utan vaksne. Det er ingen skilt som åtvarar mot skrenten. Foto: Sorosh Sadat / TV 2

– Vi valde å ivareta dei eksisterande stiane, som har medført til at det er ein overgang frå nærmiljøanlegget til fri natur. Det er etablert gjerde mot skråningen, og porten er sett inn for å oppretthalde dei eksisterande stiane, skriv han.

– Vårt fokus er no å gå gjennom korleis ein kan unngå slike hendingar i framtida. Det gjer vi i dialog med seksjon for naturforvaltning i Bymiljøetaten. 

Håpar på endring

Politiet har oppretta ei undersøkingssak av hendinga. 

– Det er førebels ikkje opna etterforsking i saka, men vi ser grunn til å gjere nokre undersøkingar for å kunne ta stilling til om saka skal etterforskast, seier politiadvokat Kristina Munkejord. 

Mora håpar at kommunen vil gjennomgå kva reglar dei har for sikring av slike typar parkar, slik at barn og foreldre kan stole på at det er trygt å ferdast der.  

Ho seier 8-åringen har det etter forholda greitt og at han slapp unna det heile med skrekken. 

HELDIG: Mora til 8-åringen seier opplevinga har fått dei til å innsjå kor skjørt livet er. Det kunne gått gale då guten falt ned her. Foto: Sorosh Sadat / TV 2

STENGER: Like ved der guten datt ned, er det fleire jernstenger som står opp av bakken. Han datt like i nærheten av denne. Foto: Sorosh Sadat / TV 2

TOK GREP: No har kommunen vore tilbake og sett opp plankar og tau for å gjere det tydeleg at ein ikkje skal gå gjennom porten. Foto: Sorosh Sadat / TV 2

Foto: Sorosh Sadat / TV 2

Det gjer likevel inntrykk på mora å høyre sonen fortelje om støkken han fekk då han falt. Han skal ha trudd han var død då han trefte bakken, fortel ho.

– Når eg ser på det no, så ser eg kor lite det var snakk om før dette hadde fått eit heilt anna utfall.