Gene Hackman og kona funnen døde

Hackman og kona, den klassiske pianisten Betsy Arakawa, blei funnen torsdag morgon blei funnet døde torsdag morgon, norsk tid.

Sheriffen i Santa Fe, Adan Mendoza, stadfestar dødsfallet overfor den lokale avisa Santa Fe New Mexican. Også hunden til paret er funnen død.

Han seier at det ikkje er mistanke om noko kriminelt, men går ikkje inn på dødsårsaka.

NRKs filmmeldar Birger Vestmo seier det var svært trist å få dødsbodskapen torsdag morgon.

– Gene Hackman var gjennom fleire tiår ein av dei mest markante skodespelarane i Hollywood, med eit intenst nærvær framfor kamera, som gjorde han til ein solid publikumsfavoritt.

Truverdig skodespelar

Hackman spelte i over 100 filmar, og fekk to Oscar-prisar i karrieren. Han pensjonerte seg som skodespelar i 2004. Han har i tillegg skrive fleire bøker. Blant anna historiske romanar saman med undervassarkeolog Daniel Lenihan.

NRKs kulturkommentator Inger Merete Hobbelstad seier Hackman spelte med stor truverd, særleg i maskuline roller.

– Han var ein karismatisk skodespelar som kom sterkt gjennom lerretet. Han var ein slags «leading man» sjølv om han ikkje heilt hadde det klassiske filmstjerne-utsjånaden, som ein gjerne forbind med andre skodespelarar frå den tida.

Starta seint

Hackman var marinejeger, og hadde også studert journalistikk, før han over 30 år gammal prøvde seg som skodespelar.

Han tok eit skodespelarkurs ved Pasadena Playhouse. Ei historie som går frå denne tida, fortel at Hackman, saman med vennen Dustin Hoffman, blei stemt fram som dei to elevane som hadde minst sjanse til å lukkast som skodespelarar.

På 1960-talet hadde Hackman fleire mindre roller på film. Han spelte blant anna rolla som Buck Barrow, Clyde Barrows bror i «Bonnie and Clyde» i 1967. Hackman blei Oscar-nominert til beste mannlege birolle for filme.

Prislønt skodespelar

Det store gjennombrotet kom som politietterforskaren Jimmy Doyle i filmen «Brennpunkt New York» («The French Connection») frå 1971. Han fekk Oscar for beste mannlege hovudrolle for innsatsen.

– Denne filmen er kjent for å ha ei av dei mest berømte biljaktene i filmhistoria, seier Hobbelstad.

Han spelte også erkeskurken Lex Luthor i «Superman» frå 1978. I tillegg gjorde han stort inntrykk i filmar som «Mississippi i flammer», «Nådeløse menn», «Firmaets mann» og «Enemy of the State» på 1980- og 1990-talet.

Han siste film blei «Welcome to Mooseport» i 2004. Men det er mange som har sakna Hackman etter han blei pensjonist, seier Vestmo.

– Så seint som i går såg eg ein episode av teikneserien «South Park», der ein versjon av Gene «Lex Luthor» Hackman kjempar mot Christopher «Superman» Reeve, som er eit eksempel på korleis Hackman festa seg i den popkulturelle verda.

Hackman vann blant anna to Oscar-prisar, to Bafta-prisar, fire Golden Globe og ein Sølvbjørn frå filmfestivalen i Berlin.