Garasje brann ned på Stord

Oppdatering: Klokka 03.47 melder politiet at brannen er sløkt. Brannvesenet var på staden ei stund etter i tilfelle brannen skulle blussa opp, men avslutta arbeidet i 05-tida.

Naudetatane blei varsla klokka 02.15 om brannen.

– Det er ikkje mykje synlege flammar lenger, men mykje røyk, sa vaktleiar i 110 sørvest Yngve Møller til NRK i 03-tida.

Han opplyser at det var ein bil i garasjen som var overtent.

Var full overtenning

Garasjen stod nedom huset og er heilt utbrent.

– Det var full overtenning, så brannvesenet har gjort ein god innsats for å avgrense skaden, seier innsatsleiar Hans Christian Dahl i politiet til NRK på staden.

No skal dei starte etterforsking av brannen og veit førebels ikkje årsaka til brannen.

– No gjennomfører vi avhøyr av dei som har vore til stades. Og så blir åstaden sperra av medan ein ventar på om det blir gjort ytterlegare undersøkingar.

Kontroll på personar

Politiet opplyser rundt klokka 02.40 at huset som er knytt til garasjen er evakuert.

Brannvesenet held fram med sløkkingsarbeidet.

– Vi oppfordrar folk i området til å lukke vindauge til røyken minkar, seier Møller.