Åtvarar mot å flytte russen sin eksamen

Utdanningsdirektoratet har sett på moglegheitene og konsekvensane av å flytte eksamen for russekullet på vidaregåande.

Rådet er tydeleg.

– Vår oppfordring til Kunnskapsdepartementet er å ikkje endre eksamensgjennomføringa til før 17. mai i 2026, står det i utgreiinga NTB har fått innsyn i.

Også KS, Utdanningsforbundet og Skolelederforbundet seier nei.

I sin første delrapport peikar Utdanningsdirektoratet på at skolane allereie med dagens ordning har problem med å gi elevane nok undervisningstimar før eksamen.

– Å flytte eksamensperioden til før 17. mai vil forsterke problema ytterlegare, står det i rapporten.

Rapporten kom før nyttår, men har ikkje blitt publisert enda.

Den slår også fast at det ikkje er rom for å kutte meir ned på skoleåret utan at det vil gå ut over arbeidstidsavtalen til lærarane.

– Opptatt av å finne løysingar

Kunnskapsminister Kari Nessa Nordtun (Ap) har sagt at målet hennar er at skriftleg eksamen allereie til neste år skal skje før 17. mai for russen.

Ho vil ikkje skrote planen, sjølv om fleire nå er negative – inkludert hennar eige direktorat.

– Eg er ikkje kjent for å vere opptatt av å finne problema, men eg er kjent for å vere opptatt av å finne løysingane. Det skal eg ikkje slutte med i denne saka heller, seier ho til NTB.

«Ikkje ønskeleg»

I utgreiinga har Utdanningsdirektoratet drøfta saka med fleire aktørar på utdanningsfeltet.

– Tilbakemeldingane frå organisasjonane er eintydige på at å flytte eksamensperioden til før 17. mai ikkje er ønskeleg, skriv dei.

Saka møter også motstand frå tunge aktørar som KS, Utdanningsforbundet og Skolelederforbundet. Dei har samla seg til felles front mot eksamensflyttinga.

– Vi kan ikkje lage eit opplegg som svekker læringa til elevane i ei tid der læringsresultata fell, og skolane jobbar hardt med å snu utviklinga. Det er også uheldig om eksamen må tilpassast russefesten, og ikkje omvend, seier avdelingsdirektør Kristin Holm Jensen i KS til NTB.

KS organiserer fylkeskommunane, som har ansvar for dei vidaregåande skolane.