Meiner fellesferien bør bli flytta til vinteren: – Sommaren er ein tragedie

Vinter og snø har dei siste vekene skapt problem for trafikken over heile landet.

Mange kjenner kanskje på vinterdepresjon når dagane er mørke og kalde.

For Öde Nerdrum er det derimot motsett. Han elskar vinteren.

– Det er da eg begynner å oppsøke menneske. Det er da eg vaknar til live frå sommardepresjonen, seier han.

I eit land som Noreg bør fellesferien heller vere på vinteren, meiner han.

– Det er jo heilt håplaust at ferien skal vere på sommaren.

Meiner fellesferien bør bli flytta

I Noreg er fellesferien lagt til dei tre siste vekene i juli. Kvifor det er slik skjønner ikkje Nerdrum.

– Om sommaren skjønner eg ikkje kvifor folk skal ha fri. Det er jo ein genial tid å jobbe på.

Vinterstid er det derimot vanskeleg å få gjort arbeid utandørs i Noreg, seier han og peikar mellom anna på arbeid på vegar og bygningar.

– Det er jo det at du ikkje får gjort noko skikkeleg arbeid i Noreg på vinteren.

– Noreg skal berre herme etter andre land heile tida. Dei ser ikkje eigne føresetnadar.

Å flytte fellesferien trur han ville ha passa betre i Noreg.

– Eg trur vi må flytte fellesferien til vinteren. Det er kjempeviktig. For alle partar.

Får støtte frå kommentator

– Eg er heilt einig med Öde, seier forfattar og kommentator i Nettavisen, Tove Taalesen.

– Politikarane burde i alle fall høyre på kva du seier. Eg håpar verkeleg at dei gjer det.

Taalesen har i motsetning til Nerdrum lite til overs for vinteren.

I fjor skreiv ho ein kommentar i Nettavisen dei ho tok til orde for at to veker ferie i Spania om vinteren bør bli finansiert over statsbudsjettet for alle som bur i Noreg.

Ho trur livskvaliteten blir dårlegare om vinteren.

– Det å bu midt i sentrum av ein by med slaps og hålke og der det er glatt og mørkt, det er for spesielt interesserte, meiner eg.

I tillegg til ser ho mykje mindre til andre menneske når alle sit inn i kvar si leilegheit.

– Så eg trur det er sunt for livskvaliteten og vinterdepresjonane å få eit avbrekk frå vinteren med eit opphald ein stad der det er litt varmare.

Det er om vinteren ein bør ha ferie for å kome seg vekk frå Noreg, seier Taalesen.

– Om sommaren er det deilig å vere i Noreg. Det finst ikkje noko vakrare enn norsk sommar.

– Men det er om vinteren vi burde kome oss vekk og få tint opp litt.

– Vi treng å fylle «lyslagera»

Catharina Elisabeth Arfwedson Wang er professor i psykologi ved Universitet i Tromsø. Ho synast det er fint at Nerdrum problematiserer det at vinteren er så mørk og kjip.

– Vi har ein tendens til å bli påverka. Når ein først begynner å sutre over at det er så fælt om vinteren, så slenger fleire seg på.

Samstundes er det mange som blir påverka av at det er lite lys om vinteren.

– Livet blir rett og slett veldig mykje meir slitsamt for mange.

– Vi menneske er akkurat som naturen elles. Vi lukkar jo litt igjen på vinteren og har lyst til å krype i hi, akkurat som bjørnen.

Om løysinga er å flytte på fellesferien er Wang derimot ikkje sikker på. Det er om sommaren kroppen får fylt om «lyslagera» seier ho.

– Vi snakkar ofte om at sommartida er ein tid kor det er viktig å få mogelegheit til å vere veldig mykje ute.

Likevel er det mange som kanskje kjenner at dei treng eit avbrekk om vinteren.

– Dei fleste arbeidsplassar har vel kanskje ein relativt fleksibel moglegheit til å ta ut dei fem vekene med ferie.

– Men at vi flytter ferien, det blir kanskje litt dramatisk. Og så treng vi jo sommaren for å fylle opp lagera med sol og for å bevege oss fritt utan masse snø og klede.

– Vinteren er på ein måte ein komedie

Nerdrum si kjærleiken til vinteren må sjåast i samanheng med at han hatar sommaren, fortel han.

– Eg er kanskje eit litt spesielt tilfelle, for eg hatar jo sol.

– Eg synest at solstrålane som treffer huda min er sjenerande. Eg synest den varmen er vond, klam og ubehageleg.

Han meiner likevel sommaren begynner på ein god måte.

– Sommaren er ein tragedie. Den startar med fantastisk blomstring og sola som treffer deg. Solstrålane i mai er heilt fantastiske, da kjenner ein seg levande igjen.

Tragediar startar godt, men ender gale, fortel Nerdrum.

– Etter kvart så rotnar alt. Blomane forsvinn, graset blir gult, og alt begynner å stinke.

Med vinteren er det motsett, fortel han. Den begynner hardt med stormar og snø før det etter kvart senkar seg ein ro.

– Det er dei dagane vi er på veg inn i no. Så det er ein slags komedie. Det ender jo med våren.

Høyr heile samtalen om vinteren med Öde Spildo Nerdrum og Tove Taalesen i NRK Radio: