Vil byte fylke: Skulesaka «fekk begeret til å renne over»

– Vi er heilt sør i eit enormt fylke. Vi føler oss ofte oversett, seier Jeppe Arnesen, gruppeleiar for Sør-Odal Venstre.

Lenge har dei meint at Sør-Odal er best tent med å vere del av Akershus.

Etter at fylkestinget i Innlandet nyleg vedtok å leggje ned den vidaregåande skulen i kommunen, seier han at dette vart enno meir aktuelt.

– Det fekk begeret til å renne over.

– Begeret rant over

Totalt vart to vidaregåande skuler og fire skulestadar vedtatt nedlagt.

Blant desse var Skarnes vidaregåande skule, som ligg i Sør-Odal kommune.

Fleire i kommunestyret meiner dei no har enno større grunn til å sjå mot Akershus.

– Vi er ein kommune i vekst, vi har auka tilflytting, og blant unge. Når dei no legg ned den vidaregåande skulen på Skarnes, tenkjer vi at vi ikkje er ein aktuell del av Innlandet, seier Anne-Mette Øvrum, gruppeleiar og tidlegare ordførar for Høgre.

– Eg opplev at det er ein stor einigheit om at dette var dropen som fekk begeret til å renne over hos oss i Sør-Odal.

Har søkt tidlegare

Samstundes er Øvrum klar på at dette har vore oppe til diskusjon tidlegare òg. Seinast i 2018 søkte Sør-Odal om å bli del av dåverande Viken fylke, men fekk nei av Stortinget.

– Vi i Sør-Odal Høgre har i fleire år vore tydelege på at vi ynskjer tilhøyrsle i Akershus. Dei siste ti åra har vi rekna oss som ein del av Oslo-regionen, seier Øvrum.

Både ho og Arnesen (V) peiker på at mange arbeidstakarar pendlar sørover til Akershus.

– Med tanke på pendling og arbeid er det heilt tydeleg at vi er tilknytt Akershus og Oslo-området i mykje større grad enn vi er til Innlandet, seier Jeppe Arnesen.

• I Lom ynskjer politikarane å opprette ein eigen privatskule, etter at skulestad Lom vart vedteke nedlagt.

– Blir ikkje sett eller høyrd

Ordførar i Sør-Odal kommune, Knut Hvithammer (Ap), seier at det vil bli ei runde på dette i kommunestyret.

– Eg hellar den vegen eg òg, men det skal ikkje gjerast i affekt no. Det er mange positive argument for det, men det skal gjerast ein grundig prosess, sier han, og peiker på at saka òg har vore oppe før.

Thomas Monsen, leiar i Sør-Odal Arbeiderparti, nemnar òg at saka har vore på tungespissen til fleire politikarar lenge.

– Men Innlandet fylkeskommune og Innlandet Arbeiderparti har sett denne saka på dagsorden for oss no, seier Thomas Monsen.

– Vi er skuffa over prosessen og over at Arbeidarpartiet ikkje lyttar til grasrota i partiet.

– Vi har forventningar til eige parti, og måten skulesaka har vorte handtert på i Innlandet er ikkje å tråd med dei.

I all hovudsak er resten av leiarane for lokallaga einige i saka om fylkesbyte. Sjå her kva dei meiner:

Thomas Breen, fylkesordførar i Innlandet for Arbeidarpartiet, viser til at dei har hatt ein prosess med mange vedtak i fylkespartiet i denne saka i både årsmøter og representantskap.

– Det er heilt sikkert læringspunkt i denne saka, den gått over to år. Ansvaret for dei partipolitiske prosessane ligg i styret i Innlandet Arbeidarparti, skriv han i ein epost til NRK.

Håpar Sør-Odal blir

Breen har forståing for at skulesaka har vore krevjande.

Han håpar samstundes at Sør-Odal kommune blir i Innlandet.

– Det er openbert at skulesaka er krevjande, og ingan likar å mista si vgs. Det er både forståeleg og naturleg. Sør-Odal har jo sjølv vore gjennom ein eigen skulesak som var krevjande, skriv han i ein e-post.

– Lokallagsleiarar i fleire parti synst Sør-Odal blir nedprioritert og oversett som kommune i Innlandet, når det bl.a. gjeld vedlikehald av fylkesvegnett og kollektivtilbud. Er du einig i det?

– Nei, men vi har no måtte hente pengar frå mellom anna samferdsel for å subsidiere drift av skuler. Og sjølv om vi har det største fylkesvegnettet i landet så ser vi at regjeringa si satsing ikkje monner for det etterslepet vi har.

– Vi kjem til å auke investeringane på samferdsel i åra som kjem som konsekvens av skulesaka.