– Vi snakkar millionbeløp

Onsdag vakna innbyggarane i Notodden og Midt-Telemark til flaum, stengde vegar og oversvømte kjellarar. 

Over førti personar blei evakuerte. Mannskapa jobbar framleis med å rydde opp etter skadane. 

Samstundes tikkar skademeldingane inn hos forsikringsselskapa. 

OVERSVØMT: Etter store nedbørsmengder har fleire gardar på strekninga mellom Bø og Gvarv blitt oversvømt og fått store skadar. Foto: Frode Sunde / TV 2

Gjensidige melder om 100 skademeldingar så langt, medan Fremtind har fått inn 127 skademeldingar etter styrtregnet. 

Frende Forsikring opplyser at dei har registrert 30 skadar på hus og bygningar. I tillegg kjem skader på campingvogner, spikartelt, bilar og utstyr. 

– Det er tidleg å anslå totalsum så langt, men det er liten tvil om at vi snakkar millionbeløp, seier Heidi Tofterå Slettemoen, kommunikasjonssjef i Frende forsikring. 

RYDDAR: Mannskapar jobba hardt i Telemark for å ta unna flaumen i Bø onsdag. Foto: Sveinung Kyte / TV 2

 – Stor utfordring

Statistikken viser at det blir meir regn og fleire hendingar som oppstår på nye stader og nye årstider samanlikna med kva ein er vane med frå tidlegare. 

Det seier Brigt Samdal i NVE. 

– Det er ei stor utfordring for samfunnet å handtere dette. 

Samdal meiner at sjølv om NVE er blitt styrka både når det kjem til midlar og personell, er det ikkje nok til å møte det reelle behovet i framtida.

NVE: Brigt Samdal er direktør i skred- og vassdragsavdelingen ved Norges vassdrags- og energidirektorat. Foto: Erik Edland / TV 2

Han fortel at NVE har rundt 300 millionar kroner i året til å førebygge skader som kjem frå flaum og skred. 

Samstundes viser ein rapport frå 2021 at behovet er på 85 milliardar kroner, om bygg som er utsett for skred i bratt terreng, flaum, erosjon og kvikkleireskred skal sikrast. 

STENGD: Flaumen tok seg over E134 på Notodden onsdag. Mange vegar var stengde som følge av styrtregnet. Foto: Sveinung Kyte / TV 2

– Det gapet er veldig stort. Som samfunn er vi nøydde til å forhalde oss til det som skjer. Anten blir vi nøydde til å rydde opp etter hendingar eller så må vi auke takta på førebygging. 

Blir dyrare 

Auken i ekstremvêr og skademeldingar er også dårleg nytt for dei som ikkje blir direkte ramma av flaum og uvêr. 

TV 2 har tidlegare fortalt at fleire forsikringsselskap har sett seg nøydde til å auke prisane på forsikring meir enn normalt, som følge av dei mange skademeldingane som har kome inn siste året. 

MEIR VÊR: Samfunnet må førebu seg på meir uvêr i tida framover. Foto: Sveinung Kyte / TV 2

– Vi merkar godt at utgiftene våre ikkje står i forhold til inntektene. Det er den enkle årsaka til at vi må sette opp prisane, sa Ole Irgens, kommunikasjonssjef i Tryg forsikring då. 

– Vi har fleire skadar. Det er i all hovudsak klimaskadar som driv kostnadsbildet vårt.