Trump vil selja gullkort til rike utlendingar

– Me skal selja eit gullkort, seier Trump, ifølgje CNN.

– Me skal setja prisen på kortet til rundt 5 millionar dollar. Det skal gje deg privilegiane av Det grøne kortet, i tillegg til å bana veg til statsborgarskap. Rikingar vil få koma inn i landet vårt ved å kjøpa dette kortet, seier Trump.

Han ser ikkje bort frå at det nye kortet kan bli kalla opp etter han.

– Nokon sa, «kan me kalla det gullkortet Trump?» Eg sa, at om det er til hjelp, bruk namnet Trump, seier presidenten, ifølgje AFP.

Også rike russarar kan bli velkomne.

– Ja, kanskje. Eg kjenner nokre russiske oligarkar som er veldig fine folk, seier Trump.

Han seier at dei truleg vil ha råd til å betala 5 millionar dollar, sjølv om «dei ikkje er så rike som dei pleidde å vera».

Russiske oligarkar har blitt råka av vestlege sanksjonar etter at Russland gjekk til fullskala krig mot Ukraina for tre år sidan.

Tilgjengeleg om to veker

Kven som helst kjem likevel ikkje inn, for det handlar ikkje berre om pengar.

– Dei må gå gjennom ei gransking, sjølvsagt, slik at me er sikre på at dei er flotte globale borgarar i verdsklasse, seier USAs ferske handelsminister, Howard Lutnick.

Trump seier han vonar at gullkortet vil bli tilgjengeleg om to veker.

Han meiner at kortet vil bli svært populært, og at millionar vil vera interesserte.

– For eksempel vil ein million kort vera verdt fem tusen milliardar dollar. Om du sel ti millionar av desse korta, blir det totalt femti tusen milliardar dollar. Me har 35 tusen milliardar dollar i gjeld, så det vil vera fint. Me får sjå, det kan bli flott, kanskje fantastisk, seier Trump.

Han legg vekt på at det først og fremst er pengesterke utlendingar som er ønska, men legg til at også at folk frå andre land som studerer på amerikanske universitet, vil ønska å bli i USA:

– Dei vil kunne arbeida, skaffa jobbar, og bygge selskap. Det vil vera folk med pengar, seier Trump, ifølgje AFP.

Risikerer at prisen er for høg

Rådgjevar i tankesmia Civita, Eirik Løkke, tolkar utspelet som nok eit eksempel på korleis Trump forsøker å tena masse pengar. Han er ikkje sikker på at det vil gje USA full pott.

– Risikoen er jo at fleire av dei som kunne tenkja seg å koma til USA, og som kan bidra med masse, vel å ikkje gjera det når prisen blir så høg, seier Løkke til NRK.

Han forklarer at USA tidlegare var plassen der alle kunne koma og prøva lykka, men at det no er blitt trongare.

–Det som har vore noko av fordelen for USA, er at du også har fått inn masse folk som kan investera og laga ting, som til dømes Elon Musk, seier Løkke.

Fleire i jobb

Trump ønskjer at gullkortet skal erstatta investorprogrammet EB-5.

Dette programmet har gjort det mogleg for utlendingar å investera i amerikanske prosjekt som skaper arbeidsplassar, og baner såleis veg for å søkja statsborgarskap.

– EB-5 programmet, det var fullt av tull, late som, og svindel, og det var ein måte å få eit billeg grønt kort på. Så presidenten sa, at i staden for å ha dette tåpelege EB-programmet, skal me ha eit Trump gullkort, sa Lutnick til journalistar, ifølgje Reuters.

Gjennom EB-5 programmet har immigrantar fått søkja seg «det grøne kortet» (green card), om dei investerer minst ein million dollar, eller 800.000 dollar i spesielle område der styresmaktene vil ha fleire i jobb.

Programmet blei etablert av kongressen i 1990. Det var meint å stimulera økonomien gjennom å skapa arbeidsplassar, og at utlendingar investerte.

Det blei likevel kritisert av begge dei politiske leirane i Trump sin første periode som president. Då blei det etterlyst reform av programmet, fordi det ikkje fungerte som tenkt.

Liknande ordningar

Hans regjering ønskte i 2019 å auka investeringsbeløpet i spesielt prioriterte område til 900.000 dollar, og 1.8 millionar i andre område, men forslaget blei stansa av ein føderal dommar i 2021.

Det skjedde fordi avdelingsleiaren i Tryggingsdepartementet (Homeland Security), som godkjende det, ikkje var utnemnd på riktig vis.

Noverande investeringsbeløp har vore gjeldande sidan regjeringa til Joe Biden heva grensa i 2022.

Fleire andre land har liknande ordningar.

Portugal sitt Gullvisum-program er populært blant folk som vil flytta til Europa.

Retting: Trump sine tal på kor mykje gullkorta kan bli verdt vart opphavleg feil oversett til norsk i artikkelen. Tala er retta 26.02.2025, kl. 09:40.