Tek lengre tid å selje: – Det er nitrist

– Det kjem ingen på visning. Det er jo nitrist, seier Elisabeth Rett.

Ho og mannen bur i eit grått funkishus i Seljord. Huset har fire soverom, store vindauge og alt er på éin etasje. Dei bygde i 2008 og huset verkar ganske moderne.

Problemet er at ingen vil kjøpe det.

Dei la det ut for sal i august. Då var prisen 5.500.000 kroner. Nyleg skrudde dei ned prisen med 300.000.

Aukande salstid

Etter fleire år med høgt tempo tek det no i snitt lengre tid å selje bustad.

I desember tok det i snitt 69 dagar frå annonsering til sal.

Bak gjennomsnittet ligg det store forskjellar, sjølv i dei store byane.

I Bergen tok det 31 dagar i januar. Tromsø hadde lengst salstid med 121 dagar. I grisgrendte strøk kan det ofte ta enda lengre tid.

Det viser tal frå Eiendom Norge.

– Nokre år hadde vi veldig kort salstid. No er det gått opp til det ein kanskje kan kalle meir ordinære nivå, seier Henning Lauridsen i Eiendom Norge.

Makroøkonom i Handelsbanken, Karina Alsvik, meiner salstida har vore unormalt kort.

– Det kom nok av veldig låge renter og veldig sterk prisvekst. No er vi meir tilbake på normale nivå, seier Alsvik.

Vil flytte nærare barna

Elisabeth Rett i Seljord synest det er trasig å ikkje få selje.

– Det verste er usikkerheita. Vi vil jo vidare, men vi tør ikkje kjøpe noko nytt før salet er i boks, seier ho.

Rett føler dei har gjort alt rett.

Ho har skrudd ned prisen og prøvd å spreie ordet både blant vener og på sosiale medium.

Barna har etablert seg i Oslo. Målet er å kunne flytte nærare dei, men enn så lenge står draumen på vent.

– Vi blir veldig i limbo, seier Rett.

Eiendom Norge har tru på framtida

For dei fleste tek ikkje det sju månder, men enkelte bustader tek tid å selje.

Mari og Lars Erik har no selt leilegheita si etter 13 månader.

– Om sal tek lang tid, så gir det meir usikkerheit, seier Alsvik.

Eiendom Norge peikar på at aukande salstid kan vere eit teikn på at marknaden er i ferd med å snu.

– Prisane auka uvanleg mykje i januar. Mange bustader som var treige å selje i haust gjekk unna no i januar. Det vil trekke gjennomsnittleg salstida opp, seier Lauridsen.

Han meiner 2025 blir eit spesielt år på bustadmarknaden.

– Det er lite bygging og det er få nye bustader som blir ferdige, så no er det relativt store sjansar for at salet vil gå raskare framover, seier Lauridsen.