Stort luftåtak mot Ukraina i natt: – Eit av dei større, seier utanriksministeren

Både Reuters og Kyiv Independent skriv at det blei høyrt fleire eksplosjonar i hovudstaden Kyiv i morgontimane.

Det er også meldingar om åtak mot fleire stadar i heile Ukraina.

– Eit av dei større luftåtaka vi har sett, seier den ukrainske utanriksminister Andrij Sybiha.

Den ukrainske energiministeren seier at Russland har angripe fleire kraftstasjonar fleire stadar i Ukraina. Straumen har blitt skrudd av i tre regionar i landet, ifølge nyheitsbyrået AFP.

Kritisk infrastruktur råka

Ordførar i Kyiv, Vitalij Klitsjko, skriv i ei melding på Telegram at det har falt restar frå rakettane fleire stader i området rundt hovudstaden.

Ifølge Kyiv Independent er det høyrt eksplosjonar i byane Kropyvnytskyi, Rivne, Ivano-Frankivsk, Cherkasy, Dnipro, Vinnytsia, Kryvyj Rih, Odesa og Zaporizjzja.

I Rivne er kritisk infrastruktur også råka, skriv Reuters, som siterer guvernøren i byen.

Sjølv om missilåtak er vanleg i utkanten av Ukraina, er det ikkje vanleg at dei ukrainske byane blir trefte av slike åtak.

Det er meldingar om fleire skada etter åtaka.