Meiner han blei skvisa ut av Solbakken: – Respektlaust

I NRK-podkasten «Bakrommet» opnar Joshua King opp om perioden da han gjekk frå å vere stjerna på landslaget til å bli vraka da Ståle Solbakken kom inn.

– Eg følte ikkje han hadde noko respekt for meg som person og som fotballspelar, seier King, og legg til at han meiner Solbakken ikkje har likt han sidan dag éin.

Angrepsspelaren, som no spelar i franske Toulouse, har 62 landskampar og har scora 20 mål for Noreg.

– Respektlaust

På slutten av 2020 tok Ståle Solbakken over som landslagssjef. King blei sist tatt ut på samling i september 2022.

– Med ein gong Ståle tok over, skjønte eg at tida mi på landslaget var over. Det var første samling i Marbella da han tok over, der hadde eg ein samtale med han i to-tre minuttar. Rett etterpå ringde eg kompisen min og sa: «Eg kjem til å bli ferdig på landslaget. Sakte, men sikkert kjem han til å skvise meg ut», fortel King.

Ståle Solbakken slår tilbake mot kritikken frå Joshua King og kallar det berre tull. Sjå svaret lenger ned i saka.

I ei av dei siste samlingane han var med på scora han tre mål da Noreg vann 9–0 i ein privatlandskamp mot Armenia.

– Viss ein annan spelar hadde scora hat trick i ein kamp, så hadde han vore med dei neste fem samlingane. Eg hadde ei samling til, og så var eg ferdig. Så eg synest det var litt respektlaust, i og med kven eg er som person, og alderen og rutinen min. Men viss han har lyst på mange unge spelarar og ikkje vil ha rutine i laget, så respekterer eg det.

Fekk ikkje telefon frå Solbakken

Han reagerer spesielt på korleis han fekk beskjeden om at han ikkje vil bli tatt ut på neste samling.

– Han turte ikkje å ringe sjølv. Det var Brede Hangeland som ringde. Så ringde han og sa: «Du blir ikkje tatt med til samlinga i juni», fortel King og legg til:

– Eg sa det var greitt. Deretter spurde eg: «Kvifor ringer ikkje Ståle meg sjølv?». Og da fekk eg til svar: «Han er oppteken». Han er for oppteken til å ringe den mest rutinerte spelaren på landslaget og berre forklare? Eg hadde respektert det om han gjorde det, men at du ikkje kan ringe sjølv ... Kva er det du er oppteken med, spør King.

Før Noreg fekk verdsstjerner i angrepet som Erling Braut Haaland (24) og Alexander Sørloth (29), var King ein av landslagets viktigaste spelarar.

– Eg seier ikkje at eg skal spele til fordel for Erling, men eg er god nok for å vere med på landslaget. Eg har jo vore «main man» på landslaget i åtte år – å gå frå det til å berre bli heilt borte ... Han kunne jo hatt meg som superinnbytar, seier King, og legg til at han også kunne hjelpt inn mot dei yngre spelarane.

Heile praten med Joshua King blir publisert i ein ny episode av Bakrommet i NRK Radio fredag morgon:

Tok ut sin eigen son

Da Markus Solbakken leverte godt på midtbanen for Viking i 2023 valde landslagssjefen å ta han med i troppen. Sonen fekk ein halvtime på banen i privatlandskampen mot Jordan og sat på benken mot Georgia. Solbakken har ikkje vore med i troppen etter den samlinga

– Han får lov til å velje sine spelarar og ta ut sitt lag. Han tok ut sonen sin, for eksempel. Og ikkje ta med andre som spelar i same posisjon som spelar høgare ligaer. Det er hans val, seier King.

King fortel vidare at det å spele for landslaget er noko det han set høgst i spelarkarrieren sin.

– Det einaste som eg har gått glipp av i karrieren som eg skulle ønske eg klarte, det er å spele Meisterligaen og eit meisterskap med Noreg. Dei to tinga hadde gjort livet komplett for meg.

Denne sesongen har han scora fire mål og har tre målgivande pasningar på 22 kampar i Frankrike. Han lukkar ikkje døra for at han kan kome tilbake til landslaget.

– Eg kjem ikkje til å komme ut med ei pressemelding og seie: «Eg legg opp på landslaget». Viss kva for ein som helst trenar, det gjeld Ståle også, ringer og seier: «Me vil ha deg på landslaget». Så kjem eg alltid til å takke ja, så lenge eg er frisk.

Solbakken: – Berre tull

Ståle Solbakken er krystallklar på at han meiner Joshua King bommar med kritikken.

På spørsmål om at King vart skvisa ut etter samtalen på Marbella, og at han ikkje skal ha likt King sidan dag éin, svarer Solbakken:

– Nei, det er berre tull frå A til Å, utan rot i verkelegheita i det heile. Det veit han inst inne. Og det veit også Brede og Kent og vi som har diskutert laget. Det går på ein rein konkurransesituasjon, at i min periode har han vore eit stykke bak Erling (Braut Haaland) og eit stykke bak Alex (Sørloth), seier Solbakken.

Landslagssjefen utdjupar:

– Han har også blitt offer for at vi ofte eller nokre gonger berre har spelt med éin spiss. Da har vi spelt med ein hengespiss nokre gonger, i den perioden han var der, og da har Thorstvedt blant anna blitt brukt i den rolla. Så det der er rett og slett ikkje sant.

– Han seier at han reagerer på at det var Brede som ringde han da han ikkje blei tatt, og at du ikkje torde å gjere det sjølv?

– Eg ringde han ved eit par andre høve. Vi fordelte det der kvar gong, dersom det er noko vi vil formidle. Eg var opptatt med heilt andre ting. Derfor var det Brede som ringde den eine gongen. Så det er også berre tull.

– Han meiner du behandla han respektlaust?

– Det er også berre tull. Han meinte i samtale med meg at Erling var den beste målscoraren, men at han sjølv var den beste spelaren. Eg sa til han at det var fint at han meinte det, men at vi tar ut det laget vi meiner er best.

– Her går det på kven som er best no, og ikkje kven som har vore best i eit historisk perspektiv. Han har jo rett i at han har vore spiss nummer 1 for Noreg i eit historisk perspektiv, før dei gutane her kom, seier Solbakken, og viser til spelarar som Haaland og Sørloth.

Solbakken er også heilt ueinig i kritikken som gjeld sonen Markus, som fekk éin landskamp i 2023.

– Du kan tenke deg kor mange rundar ekstra vi gjekk på det. Han var den beste spelaren i eliteserien i seks–sju veker der og fortente å vere med. Det der er jo litt sånn nesten på kanten barnsleg. Det er noko som du sjølvsagt scorar lettvinte poeng på, og som han bør halde seg altfor god for, meiner landslagssjefen.

– Får komme meg til Eliteserien

Då King får høyre Solbakkens svar på sine eigne utsegn i podkasten, svarer spissen at han spelte fast i England (King starta 27 Premier League-kampar for Watford sesongen 2021/22) i starten av Solbakkens tid som landslagstrenar.

– Eg hadde ingen intensjonar med å trakke på nokon da eg blei med i podkasten. Vi snakka om karrieren så langt, og erfaringane mine. Etter ein lang karriere med erfaring frå fleire trenarar merka eg tydeleg at eg var uønskt av Ståle, skriv King i ei melding til NRK.

Han avviser samtidig sterkt at han har sagt at han var betre enn andre spelarar.

– I dei to samtalane mine med Ståle har eg aldri nemnt namnet på andre spelarar, bortsett frå da eg nemnde at det er sjølvsagt at eg ikkje skal starte framfor Erling!

Og legg til slutt til:

– Eg får komme meg til Eliteserien og vere best i sju veker. Så blir eg forhåpentleg tatt med i troppen, skriv Toulouse-spelaren.