Matias har henta ut pengar frå BSU for å kjøpe vin

Matias Meling er nummer to i køen utanfor Vinmonopolet på kjøpesenteret Maxi i Sandnes. Han har sove i telt utanfor polet sidan søndag.

– Det har vore nokre kalde netter og lange dagar, men no begynner eg å sjå lyset, seier Meling når NRK møter han onsdag kveld.

Han er ikkje aleine om å ha brukt nokre kalde netter utanfor vinmonopolet.

I heile Noreg har vinentusiastar sett opp leir utanfor Vinmonopol for å forsøke å sikre seg nokre edle dropar frå det eksklusive vindistriktet Burgund.

I Oslo har dei ivrigaste stått i kø sidan romjula. Det er her ein finn dei dyraste og mest eksklusive vinane.

Vil selje vinen vidare på auksjon

Den dyrast vinen som blir lansert i dag kostar rett under 90.000 kroner. Fleire av vinane kostar rundt 50.000 kroner.

Dei aller mest ettertrakta vinflaskene er for nokon investeringsobjekt, som kan bli selde vidare for langt høgare prisar på andrehandsmarknaden.

Meling i Sandnes er blant fleire som håpar dei kan gjere profitt av vinkjøpet i dag.

– No i år tenker eg å gå ut med litt pengar, for å forhåpentlegvis tene mykje pengar.

Meling har saman med ein kompis planlagt å bruke 60.000 kroner på vinkjøpet i dag. Pengane har han mellom anna henta frå BSU-kontoen.

– I fjor klarte vi å doble det, så det ville vore draumen.

I fjor selde kompisane vinane vidare til ein Michelin-restaurant i Danmark. No vil dei undersøke om dei kan få høgare forteneste på ein auksjon i same land.

– Betyr det at du tar med deg flaskene over på danskebåten?

– Ja. Det blir ein liten tur ned til Danmark for å levere vinane, og så ein fest etterpå.

– Kjøper du med deg noko billig vin på taxfree tilbake igjen?

– Ja, den er ikkje dum, svarar Meling.

Dyre franske vinar

Det er først klokka 10 i dag at kundane får sleppe til i utsalsstader rundt om i landet.

Også ved tidlegare anledningar har vinsleppa til Vinmonopolet trekt til seg store folkemengder.

Det er innført ei kvoteordning for vinen. For fleire av vinane er det berre lov å kjøpe ei flaske. Det er ei maksgrense på 18 vinar per kunde.

Vinmonopolet lanserer nyheiter i spesialutvalet 12 gonger i året, med ulike tema.

Denne gongen er det eit spesialutval av vinar frå 2022-årgangen i det franske vindistriktet Burgund. Dette var ein særleg varm og tørr sesong.

Vinane blir seld på spesialbutikkane til Vinmonopolet. Desse ligg på i Sandnes, Hamar, Sandefjord, Aker Brygge, Valkendorfsgate, Valentinlyst, Skøyen, Tromsø, Bodø, Ålesund, Kristiansand og Rygge.