1 month ago
19
Det var ein søndag ettermiddag for snart to år sidan at ein speedbåt kom i høg hastigheit sørover i Byfjorden i Bergen.
Om bord var tre personar; to vaksne og ein gut på elleve år.
I høg fart, utanfor Vågen i Bergen sentrum, trefte båten ei bølge. Båten kantra og dei tre personane vart slengt i sjøen. Guten vart sitjande fast under båten, truleg i ein stropp frå redningsvesten sin.
Tysdag stod føraren av speedbåten, ein mann i 40-åra, tiltalt i Hordaland tingrett for aktlaus drap på sin eigen son. Han nektar straffskuld.
– Alt er berre ekstremt tungt og vanskeleg. Kvar natt spelar eg av alt i hovudet mitt. Då eg låg i sjøen ville eg berre komme meg under båten og hente han, sa ein sterkt prega mann under forklaringa si.
– Eg skulle ønska det var eg som døydde den dagen. Belastninga har vore enorm. Det har vore psykisk terror.
Dette skjedde
Allereie før retten var sett, gav han klart uttrykk for korleis han har følt seg behandla av politiet dei siste to åra.
«Uverdig og belastande», sa mellom anna mannen då statsadvokaten kom bort for å helse. Under forklaringa hevda han at politiet har loge til han under avhøyra.
Ifølge tiltalen heldt speedbåten ein fart på over 91 knop, tilsvarande 169,2 kilometer i timen, like før ulukka skjedde.
Farten er utrekna ved å spore GPS-lokasjonane til ein av mobiltelefonane som var i båten. To overvåkingsvideoar, hakkete og frå lang avstand, vart også synt fram i retten.
Været var fint, berre krusingar på sjøen og ingen vind.
Ein annan hurtigbåt, MS «Admiralen», var i sekunda før ulukka på veg ut av Vågen.
Der gav den gass, noko som skapte bølger i retninga der den tiltalte mannen kom med sin båt.
– Såg ikkje bølgene i tide
Påtalemakta meiner mannen heldt for høg fart etter forholda og ikkje var merksam på at hurtigbåten hadde gått ut frå Vågen.
– Derfor vart ikkje bølgene frå MS «Admiralen» oppdaga i tide. Og båten velta i desse bølgene. Det er resonnementet som ligg til grunn for tiltalen, sa konstituert statsadvokat Are Nygård Bergh.
– Så er saka ein forferdeleg tragedie for tiltalte. Han er hardt råka av dette. Så kvifor fremjar vi saka i retten? Det er det allmennpreventive som er grunnen til det, sa Bergh.
Han la til at både belastninga for tiltalte, og den lange saksbehandlingstida i politiet, vil bli hensyntatt når det skal leggast ned påstand om straff.
§ 281. Uaktsom forvoldelse av død
Med fengsel inntil 6 år straffes den som uaktsomt forvolder en annens død.
– Drog ned gassen
Mannen i 40-åra hadde gråten i halsen då han fortalde kva som skjedde ulukkesdagen for to år sidan.
Han innrømma at han ikkje hadde sett MS «Admiralen» køyre ut frå Vågen. Men då han fekk auge på bølgene, drog han ned gassen «heilt ned i null».
Han meiner difor at farten var langt lågare enn det påtalemakta hevdar då dei trefte bølgene.
– I over 90 knop hadde båten blitt knust om den gjekk rundt slik og vi hadde døydd alle tre. Men båten har lite skader. Det var vinkelen på bølgene som gjorde at vi gjekk rundt, forklarte mannen.
Han sa også at den første bølga bremsa farten enno meir, før den andre bølga gjorde at dei gjekk rundt.
Sonen svara på ropa hans
Ellen Eikeseth Mjøs forsvarar tiltalte. Ho viste retten den trådlause «dødmannsknappen» som tiltalte brukte.
Motorane på båten stoppar om den blir utløyst av at føraren ramlar i vatnet.
– Det kjem ein sakkunnig rapport på at gasspådraget er «dratt av» i fjorten sekund før «dødmannsknappen» blir utløyst, påpeika Mjøs.
Så fortalde tiltalte om minutta etter at båten gjekk rundt.
– Vi hamna i sjøen. Det kjennest som om venstre arm er riven av. Eg er hysterisk og ropar på sonen min. Og han svarte frå under båten. Eg reiv av meg jakka og prøvde å komme meg under.
Det kom raskt hjelp til staden. Mannen forklarte at han prøvde å få dei til å redde sonen sin.
– Eg ropte til alle «vær så snill, kan dykk hoppe uti, båten er ikkje djup». Men dei svara at vi måtte vente på dykkarar frå brannvesenet.
– Eg hadde hoppa i døden for han
Statsadvokaten fortalde retten at det blei gjort forsøk på å hente guten under båten, men at dei første på staden ikkje lukkast i det.
Dykkarar frå Bergen brannvesen fekk til slutt guten laus.
– Eg såg at dei henta han ut og at dei fekk han opp i båten og prøvde på hjarte/lunge-redning. Eg lovar dykk, eg hadde hoppa i døden for han. Eg har prøvd å gjere alt riktig for barna mine. Og så falt alt i stykke.
Ti dagar seinare døydde sonen hans på sjukehuset. Den tiltalte skildra tilstanden sin som «heilt knust» og at livet er blitt svært vanskeleg. Familien har også fått hatbrev, fortalde han.
– Når vi kom innover mot byen, hadde vi god sikt og sjøen var stille. Eg såg ingen båtar framfor meg. For å seie det slik, hadde eg sett «Admiralen» gå ut og bølgene kome, hadde dette aldri skjedd.
– Kva hadde du gjort då?, spurte dommaren.
– Då hadde eg sakka farten heilt ned. Eller køyrd opp mot Askøybrua for å køyre rett på bølgene.
Fleire vart vitne
Fleire personar i og rundt sentrum av Bergen vart vitne til båtulukka 11. september 2022.
I alt sju personar skal vitne i retten om kva dei såg denne søndag ettermiddagen.
I tillegg skal den tredje personen om bord, ei kvinne, gi sin forklaring om det som skjedde.
– Ein stor tragedie
Den tiltalte faren i 40-åra erkjenner altså ikkje straffskuld. Han blei sjølv varig og alvorleg skadd i ulukka.
Forsvarar Ellen Eikeseth Mjøs fortalde retten at far og son hadde båt som hobby saman og at guten var «lidenskapeleg oppteken av båtar og elska å køyre båt saman med sin far».
– Han har allereie fått ein livstidsdom. Ein rettssak no, to år etter ulukka, er ein enorm belastning. Han har vore i lammande, mørk og djup sorg.
Ho opplyste vidare at tiltalte skal vera ein svært erfaren båtførar og har «tallause timar bak rattet i denne båten og i denne farten».
English (US)