Kan ta fleire dagar før alle har fått tilbake straumen

Fredag var det eit forrykande uvêr i store delar av Midt-Noreg. Fleire stader var vindkasta oppe i orkan styrke.

Over 40.000 husstandar var utan straum på det meste og bruer og ferjesamband var stengde.

Laurdag jobbar nettselskapet Tensio med å få straumen tilbake, men det vil ta tid, varslar dei.

Vil ta fleire dagar

Laurdag klokka 18.30 var framleis om lag 10.500 husstandar utan straum.

– Det er framleis veldig mange feil. Det heng saman med at uvêret har ført til omfattande skadar mange plassar i straumnettet, så det er eit krevjande feilrettingsarbeid, seier kommunikasjonssjef i Tensio, Bengt Eidem, til TV 2.

Han seier det vil ta tid før alle har fått straumen tilbake.

– Med det vi har fått oversikt over i løpet av dagen i dag, så ser vi at dette er noko vi kjem til å bruke fleire dagar på, seier Eidem.

Hovudårsaka til straumbrota i Midt-Noreg er tre som har falle over straumlinjer, men det er også andre typar skadar på straumnettet.

VIL TA TID: Nettselskapet trur det vil gå nokre dagar før alle har fått straumen tilbake etter uvêret fredag. Foto: Tensio

Også for Statens vegvesen var det ein hektisk dag fredag. Trafikkoperatør Hans Petter Riddervold Hårsvær fortel at det var «frykteleg mange tre» som velta over vegane i Midt-Noreg.

Laurdag har det meste av vegnettet opna igjen, men fv. 17 på Vassbotna i Høylandet kommune er framleis stengt på grunn av flaum.

FLAUM: Ein fylkesveg i Overhalla hamna under vatn fredag ettermiddag. Foto: Kjetil Langeng / NTB

Nord-Trøndelag hardast råka

Det er særleg nord i Trøndelag at det er mange hus utan straum. Informasjonssjef Julie Hæhre i Telenor opplyser at det er kommunane Nærøysund, Flatanger, Steinkjer og Namsos som er hardast råka.

I det same området er det også mange som ikkje har mobilnett laurdag. Det har samanheng med straumbrotet, fortel Hæhre.

– Vi har ekstra personell på jobb, følgjer tett opp med kraftlaget og jobbar på spreng for å få det opp igjen, seier Hæhre.

At det er eit stort geografisk område med spreidd busetjing som er råka, gjer at arbeidet er tidkrevjande, seier Eidem i Tensio.

– Det gjer det komplekst, og når det er store område med mykje treproblematikk så tar det dessverre lang tid, seier han.