I tårer etter ny VM-medalje: – Hadde ikkje trudde dette

– Eg er kjempenøgd etter den sesongen eg har hatt, seier sølvvinnaren til NRK.

Ho held fram:

– Eg er berre veldig glad. Eg hadde ikkje trudd dette for eit halvt år sidan eller etter gjennom sesongen. Dette sølvet smakar betre enn dei to gulla eg har frå før.

Ekspertane meinte Gyda Westvold Hansen ikkje fekk det heilt til i det avsluttande hopprennet i Granåsen.

– Det var mykje vilje, men ho fekk det ikkje heilt til, sa sportssjef Ivar Stuan.

– Det er ikkje eit makshopp av Gyda. Eg trur ikkje ho er heilt nøgd, sa NRK-ekspert Magnus Moen etter at sølvet var sikra.

Yuna Kasai frå Japan vart verdsmeister.

Fire på topp 10

Det vart heller ikkje heilklaff for dei andre norske, sjølv om laginnsatsen samla sett var bra.

Marte Leinan Lund låg på andreplass etter langrennet, men enda på 8. plass.

– Eg er eigentleg nøgd. Hoppinga er på rett veg, sa Leinan Lund.

Ida Marie Hagen skuffa i langrennet, og klarte heller ikkje å levere i hoppbakken.

– Dette er ein utøvar som har vore på leiting etter gode svar. Ho er knytt i posisjonen sin, sa Magnus Moan om Hagen sitt hopp.

Hagen vart til slutt nummer 10.

– Det er ikkje dette eg trenar for, seier Hagen sjølv etter rennet.

Få reaksjonar her:

17 år gamle Ingrid Låte hoppa heile 100,5 meter og enda på ein imponerande 9. plass. Låte var nummer 32 etter langrennet.

– Atypisk

Torsdagens VM-renn i kombinert starta med fem kilometer langrenn fellesstart.

Norge gjorde samla sett ein sterk langrennsdel, men rekkefølga på dei norske utøvarane vart annleis enn venta.

Ida Marie Hagen gjorde det svakare enn forventa, medan Gyda Westvold Hansen var best av alle.

– Dette er heilt atypisk. Gyda Westvold Hansen går ifrå Ida Marie Hagen, sa NRK-kommentator Jann Post.

– Ida Marie Hagen er faktisk prega. Ei overraskande utvikling, sa ekspert Torgeir Bjørn.

Hagen var på ingen måte ute av medaljekampen, men mange hadde forventa eit betre langrenn av henne.

Hagen enda sju sekund bak Westvold Hansen på femkilometeren. Det betydde ein differanse på 1,8 poeng.

Viste til episode i januar

Kombinertsjef Ivar Stuan meinte Hagen framleis er prega etter disken i Seefeld i januar.

– Eg trur det som skjedde i januar ikkje var så veldig bra, og at det øydelegg for henne, sa Stuan.

– Overraskande at Stuan vel å fokusere på det. Ein må kome seg vidare, kontra Magnus Moan.

Sjølv sa Ida Marie Hagen til NRK at det vart tøft.

– Eg prøvde å gå litt ifrå, men det var ikkje lett. Eg gav det ein skikkeleg sjanse. Eg er glad for at Gyda vann langrennet. Det viktigaste er at det blir norsk gull, sa Hagen.

– Ein gullkandidat

Tre nordmenn låg inne på topp fem etter langrennet:

Gyda Westvold Hansen, Marte Leinan Lund og Ida Marie Hagen.

– Ho seglar opp som ein stor gullkandidat, sa NRK-ekspert Torgeir Bjørn om Westvold Hansen.

– Det er eit meisterskapsgen som dukkar opp, og det er sterkt, meinte kombinertsjef Ivar Stuan om Westvold Hansen.

– Ho er så sprek i dag at ho kan leike seg i feltet. Det gjer du ikkje når du ikkje er i form, sa Magnus Moan.

– Eg er best når det gjeld, varsla Westvold Hansen sjølv til NRK.

– Irriterande

Tyske Nathalie Armbruster var som forventa også i gullkampen og låg på fjerdeplass.

Armbruster og Ida Marie Hagen var også involvert i eit uhell.

– Armbruster kjem bakfrå, så det er eigentleg hennar ansvar. Men det ser ut som eit typisk løpsuhell, seier Torgeir Bjørn.

– Eg synest det var irriterande, men det er sånt som skjer. Eg forstår jo at det ikkje var med vilje, kommenterer Ida Marie Hagen sjølv.

Gyda Westvold Hansen tok to gull i VM i 2023, eitt individuelt og eitt i blanda lagkonkurranse.

Ida Marie Hagen tok eitt gull den gongen, i blanda lagkonkurranse.

Westvold Hansen vann også eit individuelt VM-gull i 2021.