Etterlyser blodgivarar: – Vi treng alle

Dei siste dagane har Blodbanken i Oslo sendt meldingar til fleire blodgivarar, i håp om at nokon ønsker å donere blod på kort varsel.

– Vi har henvendt oss til våre O+-givere i Oslo dei siste dagane, då lageret av denne blodtypen har vore ein del lågare enn ønskeleg, seier seksjonsleiar Lise Sofie Nissen-Meyer i Blodbanken i Oslo.

– Det har hatt effekt og tala er på veg oppover, men vi treng framleis at fleire blodgivarar med denne blodtypen kjem og gir blod i tida framover, seier Nissen-Meyer.

Færre gir blod

Det er ikkje klart nøyaktig kor mange aktive blodgivarar som er i Norge i dag. Dei siste kjende tala frå 2021 viser at det var 90.136 personar som tappa blod minst ein gong i året. I 2020 var det same talet 92.114.

– Årleg er det ca. 15-20.000 blodgivarar som av ulike årsaker, som alder eller sjukdom, melder seg av som blodgivar. I tillegg er det fleire blodgivarar som blir sett i karantene, seier seniorrådgivar i Røde Kors, Camilla Rodø.

– I dag er om lag to prosent av befolkninga aktive blodgivarar, og vi strevar etter å ligge på om lag tre prosent, seier Rodø.

Ein kan bli sett i karantene på grunn av til dømes sjukdom, medisinar, vaksinar eller viss ein har bytta seksualpartnar.

I tillegg må ein i karantene viss ein har vore på reise utanfor Norden. Mellom anna må ein fire veker i karantene etter reiser i ein del land i Sør-Europa. Årsaka er at det er ein del virus som smittar frå mygg i regionen. 

Manglar om lag 100

Blodbanken i Oslo manglar blod frå om lag 100 givarar med blodtypen O+. I tillegg har dei litt mindre blod av typane A+, AB+ og AB-, enn kva Nissen-Meyer skulle ønske.

– Behovet for blod er ganske konstant, mengda pasientar aukar, men ein blir flinkare til å gje blodet til dei som har mest nytte av det, seier ho.

TRENG BLODGIVARAR: Seksjonsleiar Lise Sofie Nissen-Meyer seier at Blodbanken i Oslo særleg treng blodtypen O+ for tida. Foto: Martin Berg Isaksen / TV 2

Blodet som blir donert, går mellom anna til pasientar med kreft, planlagde operasjonar, kvinner som har født og personar med kronisk sjukdom.

I tillegg går mellom 10 og 15 prosent av blodet til personar som har vore i ulukker eller har blitt utsett for vald.

– Treng alle

Dei siste to åra har Blodbanken i Oslo fått eit system der blodgivarar kan bestille time på nett.

– Det har fungert veldig bra. Givarane er veldig fornøgde med at dei kan endre timen sin sjølv på nett.

Nissen-Meyer har likevel ei oppfordring, for det er mange som har avbestilt timen like før dei er sett opp.

– Dei må helst gjere den endringa litt meir enn 24 timar før dei kjem, og så må dei gjerne kontakte oss viss dei skal ha ein lengre pause, seier Nissen-Meyer.

– Kven treng de blod frå?

– Vi treng alle, og alle blodtypar, seier Nissen-Meyer.