Det er veldig, veldig vanskeleg å forstå at å vaska klasserom sjeldnare gir betre kvalitet.

KOMMENTAR: Det er vel heilt fint å læra å rydda skikkeleg opp etter seg, også på skulen? Læra seg å respektera andres jobb og kvardag?

Elevar på Våland skule i gang med sop og vask. Foto: Fredrik Refvem

Greia er at det har gått ut eit bod – eller eit skriv – frå kommunen. I Stavanger. Om korleis klasserommet og resten av skulen skal sjå ut, før elevar og lærarar er ferdige for dagen. Og poenget, skal vi tru det som først kom fram i Aftenbladet, er at reinhaldarane skal få ein betre arbeidsdag og lettare jobb. Dei skal møta same standard når dei kjem for å gjera jobben, anten det er på rådhuset, trur eg, eller på ein skule.

Tommel opp!

I klasseromma skal det ryddast, pultane skal tørkast av, søppelet skal tømmast og golvet sopast. Stolane skal vera snudde opp på pulten før du går.

Det er vel heilt fint og ganske vanleg? Ein del av danninga? Noko som trengst å lærast, og ikkje berre heime? Både å rydda opp etter seg sjølv og at det av og til er din tur til å rydda opp etter andre? Noko du neppe får varige mein av, men som heller bidrar til å gjera deg til eit ok menneske når du skal ut og møta verda og framtida.

Har du laga mat, blir det meir rot og søl. Golvet må kanskje vaskast. Har du hatt sløyd? Du må gjera sløydbenken rein til neste elev som skal bruka den.

Det tar jo tid. Men det skal ein vel også læra seg at det gjer? At dagen er ikkje heilt over og oppgåva ikkje heilt gjort, før ting igjen ser ut som det gjorde før du heiv deg uti kva det nå var du gjorde.

Læring?

I Utdanningsforbundet, den største fagforeininga til lærarane, er Elin Djuve redd for at dette skal ta endå meir frå kjerneoppgåvene til læraren. At det ikkje er undervisning, ikkje relasjonsarbeid.

Eh, jo, det kan det veldig godt vera. Begge delar.

Og viss det er nokon som er gode på å få til skikkelege praktiske rutinar for ein heil flokk elevar, sånn at ting blir gjort med minst tenkeleg mas og kaos, så er det lærarane. Dei er dritgode på å organisera, gi rette oppdraget til rette eleven, og byggja ein god dose relasjon og meistring samtidig. Faktisk.

Så nei, dette treng jo ikkje vera det same som å ta frå kjerneoppgåvene til lærarane.

Men?

Det var ikkje heilt så edelt frå kommunen si side. Dei skal også spara pengar på dette. Og dei skal kutta ned på reinhaldet. Vanlege klasserom skal berre vaskast to gonger i veka. I Sandnes, for eksempel, er det fire-fem gonger i veka.

Er det sånn at reinhaldarar mistar jobbane sine nå? Får færre arbeidstimar? Mindre å leva av? At lærarane får beskjed om å overta og organisera arbeidsoppgåver som klart ligg hos ei anna yrkesgruppe, som så blir den yrkesgruppa som kjem dårlegast ut av dette?

Eg trur dessutan lærarane må ha gnagsår på yrkessjela si av oppgåvene vi andre, for eksempel foreldre, ikkje når over, og lempar inn i skulen. Eller av å prøva å bruka ein del av seg sjølv til å vera psykolog, eller spesialpedagog, eller litt helsesjukepleiar, fordi det ikkje er nok andre som er det, og fordi det trengst. Lærarar gjer som regel det som trengst, så langt dei klarer. Det kan ha blitt for mange steinar i skoen nå. Og lista over reint praktiske hald-orden-oppgåver er altfor lang til at det kan organiserast som ei grei oppgåve for elevane.

Jo, eg synest elevane skal læra seg å rydda opp etter seg, også på skulen. Til og med læra seg at det tar tid. Og heilt fint, det, om det nå skal inn i same standard i alle klasserom, så reinhaldarane møter same standard når dei kjem på jobb.

Men i tillegg skal det kuttast i reinhaldet. Det skal berre vaskast annakvar dag i dei fleste rom på skulane nå.

Lik standard? For kven?

Har du kjent lukta i gangen på ein skule? Blandinga av gamle matpakkar, sur mjølk og sure sko? Har du sett i din eigen gang kor ufatteleg mykje graps som kjem inn under barnesko?

Korleis blir det for lærarar og elevar å møta den nye dagen når det ikkje har blitt vaska dagen før, berre rydda og sopt? Eg trur vel ikkje dei møter heilt same standard som ein gjer i reine administrasjonsbygg ein uvaska morgon. Det kunne det jo vera rimeleg at dei gjorde? Respekten for andres dag og arbeid, og så vidare? Den må jo gjelda for lærarar og elevar også?

Men kommunen! Kommunen er sikre på at å kutta i reinhald faktisk fører til betre kvalitet: «Vi har gjennomgått bruken av byggene, vurdert behov og erfaringer, og sett på hvordan vi kan bruke ressursene mest mulig effektivt. Resultatet er en ny renholdsstrategi som gir både bedre kvalitet og lavere belastning på miljøet»

Det er veldig, veldig vanskeleg å forstå at å vaska klasserom sjeldnare gir betre kvalitet.

Og det er veldig, veldig vanskeleg å forstå kor dumt kommunen tenker det er greit å skriva om sparetiltak.