Heile 21 kommunar i Nordland har ikkje ein plan, eller er ikkje ferdig med ein plan, for å førebygge omsorgssvikt mot barn og unge eller alvorlege åtferdsproblem.
I ei undersøking gjort for Barneombodet, kom det fram at mange kommunar manglar nettopp ein slik plan.
Deriblant Bodø kommune.
– Vi er jo litt lovleg seint ute. Men i og med at oppvekstplanen vår frå 2018 inneheld eit element av førebygging, så har vi bygd på det. Vi skal bruke den tida vi treng for å få det best mogleg, har konstituert sjef for oppvekst og kultur i Bodø, Anna Velle, sagt.
No opplyser Statsforvaltaren i Nordland kor mange kommunar som står utan ein slik lovpålagt plan i dag.
• 15 kommunar har ein plan
• 14 kommunar har begynt på arbeidet
Desse er Andøy, Sømna, Hattfjelldal, Rana, Beiarn, Brønnøy, Vefsn, Nesna, Bindal, Lurøy, Bodø, Vågan, Herøy og Meløy.
• 7 kommunar har ikkje ein plan
Desse er Alstahaug, Hamarøy, Hemnes, Steigen, Sørfold, Fauske og Moskenes.
Så er det fem kommunar som ikkje har svart på undersøkinga: Dønna, Evenes, Røst, Vega og Værøy.
Det er tredje gongen at Statsforvaltaren gjennomfører ei slik kartlegging. Neste kartlegging blir i januar 2026, seier kommunikasjonssjef Wigdis Korsvik.
– Undersøkinga for i fjor viste at det berre var ni kommunar i fylket som hadde ein slik plan. Vi ser at dette er noko som stadig fleire kommunar tar tak i.
Korsvik seier at arbeidet er komplisert, men at Bufdir held på med å utvikle ein rettleiar.
– Det tar tid å utvikle ein plan for å førebygge omsorgssvikt eller alvorlege åtferdsvanskar, fordi det skal vere tverrfagleg prosess i kommunane og bli forankra i kommunestyra, seier Korsvik.
English (US) ·