Denne familien får bu gratis i Geiranger

– Vi fekk inn så utruleg mange gode søknader. Det var ei litt for stor moglegheit som gjekk forbi oss om vi berre tok inn enn éin eller to, seier direktør i Geirangerfjorden verdsarv, Katrin Blomvik Bakken.

• I haust etterlyste dei tre bygdene Geiranger i Noreg, þingeyri på Island og Vágur på Færøyane folk som ville oppleve ein mørk, roleg og tidvis heftig arktisk vinter.

Vil skape meir liv

Gjennom stipendet Arctig Digital Nomads Stipend kan folk ta med seg jobben sin, og prøvebu bygdene gratis i inntil tre månader.

Sterk sentralisering gjer at mange bygdesamfunn døyr ut.

Fleire land i Europa jobbar difor med å tiltrekke seg folk som kan ta med seg arbeidet kvar som helst – digitale nomadar.

I Geiranger yrer det av turistar om sommaren.

Katrin Blomvik Bakken har eit brennande ønske om å skape meir liv og få ny kompetanse til heimbygda også om vinteren.

Og kanskje vil nokre av dei digitale nomadane slå seg til ro her?

– Det er draumen, seier ho.

16 digitale nomadar

Heile 16 digitale nomadar blei plukka ut til å bu i Geiranger og nabobygdene Eidsdal og Norddal denne vinteren.

Nomadane kjem frå Italia, Island, Belgia, Tyskland og Noreg.

Fire av dei er Twyla Mergan (38), Wouter Vergote (44) og døtrene Mona Vergote (10) og Robyn Vergote (7).

– Det er som å vere i eit fly, seier Twyla Mergan om utsikta frå leilegheita dei bur i no.

Foreldra har hatt eit sterkt ønske om å bryte ut av rammene dei lever i, i byen Leuven, like ved Brussel i Belgia.

– Men det er vanskeleg. Gjennom dette stipendet er alt lagt til rette for at vi kan teste ut noko anna. Du treng ikkje endre heile livet ditt for å få det til, sidan du bur gratis og har folk som kan hjelpe deg med å bli ein del av samfunnet, seier dei.

• Færre arbeidsplassar blir flytta ut i distrikta – sjølv om politikarane konkurrerte om å vere best på det.

På jakt etter meir natur

Familien meiner det meste av natur i Belgia er nedbygd eller kontrollert, og dei synest det er frigjerande å ha vill og vakker natur rundt seg i Geiranger.

– Vi vil vise jentene at verda er meir enn byen dei vaks opp i, seier Twyla Mergan.

I første omgang skal familien bu i sunnmørsbygda til midten av april.

Jentene skal ha belgisk heimeskule, men dei får også gå på norsk skule i Geiranger.

Foreldra er designarar, og kan gjere jobben kvar som helst.

Ny sjanse neste år

Direktør i Geirangerfjorden verdsarv, Katrin Blomvik Bakken, har verkeleg trua på at prosjektet vil skape meir liv i bygdene om vinteren.

– Eg sit med ei sterk kjensle av at i alle fall nokre av dei kjem til å hamne enten her, eller i eit anna lite bygdesamfunn i Noreg, så vi gjer definitivt noko bra for distriktet.

Og no skal dei digitale nomadane hjelpe til med å gjere prosjektet enklare å administrere til neste utlysing.

For det kjem ein ny sjanse til å få bu gratis i Geiranger neste år.

– Det gjer det absolutt, lovar Katrin Blomvik Bakken.