Britiske medium: Tate-brørne skal ha reist frå Romania

Brørne står overfor fleire kriminelle skuldingar i landet. Dei hadde blitt lauslatne frå husarrest, men fekk tidlegare ikkje lov til å forlate Romania.

Det var torsdag morgon at brørne reiste ut av landet med eit privatfly, melder Sky News og BBC. Brørne skal ha sett kursen mot USA.

Ifølge Reuters har den rumenske påtalemakta gitt brørne løyve til å reise ut av landet i påvente av straffesaka mot dei.

Tidlegare i februar meldte The Financial Times at Donald Trump hadde gjort fleire forsøk på å presse Romania til å lette på reiserestriksjonane mot Tate-brørne.

Rumenske styresmakter har derimot avvist at dei har blitt pressa til dette.

Andrew Tate har vore uttalt Trump-tilhengar.

Tiltalt for valdtekt og menneskesmugling

Den tidlegare kickboksaren Andrew Tate, broren og to andre kvinner er tiltalt for mellom anna valdtekt og menneskehandel.

Dei skal vere ein del av eit kriminelt nettverk i heimlandet, der formålet var å utnytte kvinner seksuelt.

Tate-brørne har også blitt skulda for skattesvindel på fleire millionar kroner i Storbritannia og er etterlyst at britisk politi.

Begge nektar for skuldingane om menneskesmugling av mindreårige, seksuelle overgrep og kvitvasking av pengar, samt å ha starta ei organisert kriminalitetsgruppe.

Andrew og Tristan Tate har i fleire år vore aktive på sosiale medium og har fleire milliardar visningar.

Dei er kjende for ytre nedlatande haldningar til kvinner og vise fram ein overdådig livsstil med privatfly, dyre bilar og yachtar.